GINAPAKYAS SA BAGONG Hukbong Bayan (BHB) ug sa masang mag-uuma sa mga lungsod sa Maria Aurora ug Dipaculao sa Aurora ang walay-hunong nga focused military operation sa 91st IB ug 84th IB gikan pa niadtong Mayo. Dili moubos sa pito ka tropa sa militar ang napatay samtang duha ang nasamdan sa tulo ka magkasunod nga engkwentro niini sa hukbong bayan.

Nahitabo ang unang engkwentro sa Barangay Toytoyan, Dipaculao niadtong Mayo 20, sunod ang panagsangka sa Barangay Salay, Dipaculao niadtong Mayo 21 ug usa pa niadtong Mayo 28 sa Barangay Bazal, Maria Aurora. Militanteng misukol ang hukbong bayan ug luwas nga nakamaniobra.

Sobra-sobra nga pwersang militar ang gibubu karon sa Armed Forces of the Philippines (AFP) sa duha ka lungsod aron gukdon ang ginasulti nilang “nahabilin” nga mga manggugubat sa BHB. Nagagamit ang AFP og mga helikopter, drone ug uban pang superyor nga armas para sa mga operasyong kombat niini.

Niadtong Mayo 20-21, duha ka helikopter ang gigamit sa 91st IB sa pagtuyok-tuyok sa unum ka barangay sa Dipaculao. Sunod niining gialirungan ang tulo ka barangay sa Maria Aurora kung asa naghulog sila og mga bomba sa mga bukid. Dugang dinhi, nagpaulan og bala ang 91st IB. Nataho ang pagkamatay sa usa ka batan-on tungod dinhi.

“Imbes nga igahin ang pondo sa katawhan sa paghatag og de-kalidad nga serbisyong publiko, nag-usik-usik ang AFP og milnilyong pondo sa makanunayong mga operasyong kombat,” pamahayag sa BHB-Aurora.

Grabeng dislokasyon ug terorismo ang dala sa maong mga operasyon sa AFP sa sibilyang populasyon. Padayon silang gibawalan nga manginabuhi sa baryo ug bukid.

Sa rekord sa Department of Social Welfare and Development niadtong Mayo 25, mikabat sa 3,633 ka pamilya ang naapektuhan sa walay-hunong nga operasyong kombat sa AFP sa lugar.