Upat ka mag-uuma ang gipatay sa Armed Forces of the Philippines (AFP) sa Masbate ug Negros Occidental niadtong Mayo. Pare-pareho silang gipagawas nga myembro sa Bagong Hukbong Bayan nga napatay sa “engkwentro.” Nataho usab sa milabayng bulan ang pag-aresto sa tulo ka sibilyan, lakip ang usa ka gamayng bata.

Pagpatay. Sa Masbate, gipatay sa 96th IB ang 31-anyos nga mag-uumang si Erlindo Natural niadtong Mayo 7 sa Barangay Holjogon, Mobo. Si Natural ang ika-29 nga biktima sa pulitikanhong pagpamatay sa prubinsya ilalum sa rehimeng Marcos.

Sa Negros Occidental, giatake sa dili moubos sa 24 kax tropa sa 62nd IB ang balay sa pamilyang dela Peña sa Sityo Inangaw, Barangay Quintin Remo, Moises Padilla niadtong Mayo 21 sa buntag. Gipaulanan kini og bala ayha iligal nga giaresto sa mga sundalo si Richard dela Peña, gidala palayo sa iyang balay ug tinuyong gipatay.

Niadtong Mayo 22, tinuyong gipatay sa mga sundalo sa 79th IB ang mag-uumang si Jeje Redobles sa Sityo Manaysay, Barangay Camabayobo, Calatrava. Si Redobles usa ka yanong mag-uuma sa kamote ug saging.

Niadto usang Mayo 30, patay ug nakahiagum og upat ka igo pinusilan ang mag-uumang si Jigger Barotolo sa Sityo Sangay, Barangay Hilub-ang, Calatrava. Gipatawag siya sa mga ahente sa 79th IB gikan sa pagpasabsab sa iyang kabaw ug ayha gipatay.

Pag-aresto. Sa Masbate, giaresto sa mga pwersa sa estado si Tinay Ontog sa Barangay Maglambong, lungsod sa Monreal niadtong Mayo 18.

Sa wala naklarong petsa, giaresto usab sa mga pwersa sa estado si Baby Arnejo ug iyang anak sa Barangay Madao, Uson. Sa paghingusog sa iyang mga silingan, nabawi ang gamayng bata ug nabutang sa maayong kustodiya samtang napriso pa gihapon ang iyang inahan.

Pagdagit. Kapin duha ka bulan nang nawala ang ulitawong si Joy Delica, 32-anyos, sukad nga gidagit siya sa dili moubos sa 30 ka sundalo sa 4th ID sa balay nga iyang gisak-an sa Barangay New Compostella, Damulog, Bukidnon niadtong Marso 18. Gigapos ang mga kamot ug tiil ni Delica ug gisakay sa sakyanan sa mga sundalo.

Gibawalan sa mga sundalo ang mga residente nga nanghingusog nga ubanan si Delica aron masiguro ang iyang kaluwasan. Hangtud karon, wala pa siya nakaplagan.