Napirmaan idi Hulyo 6 ti katulagan militar iti baet ti Pilipinas ken Japan a Reciprocal Access Agreement (RAA). Iti kaunaan a gundaway manipud di nalpas ti Maikadwa a Gubat ti Lubong, palubosan daytoy ti panagserrek ken panagtalinaed dagiti tropa ti imperyalista a Japan iti pagilyan. Palubosan daytoy ti nawaya a panagruar-serrek dagiti tropa a Japanese iti linged ti pinagtipon a panagsanay ken kooperasyon. Dakkel ti panagpada daytoy iti agraraira a Visiting Forces Agreement iti baet ti US ken Pilipinas.

Ti RAA ket nakapauneg iti Indo-Pacific Strategy ti US nga addaan kangrunaan a panggep a lapdan ti panaglawa ti pigsa ken impluwensya ti China, a komon a karibal ti Japan ken US. Napirmaan daytoy iti konteksto dagiti pinairteng nga operasyon militar ti Japan iti sabali a pagilyan iti balangkas ti Quad (Quadrilateral Security Dialogue) nga idadauluan ti US, ken ti dumakdakkel a papel daytoy kadagiti panagsanay ken panagsagana iti gubat.

Iti probokasyon ti US iti napalabas a tawtawen, pinapigsa ken pinalawa ti Japan ti aw-awagan daytoy a self-defense force kas maysa a pwersa a panggubat, banag nga agdadata nga iparparit ti bukod na a konstitusyon. Idurduron ti US ti Japan a pangatuen ti badyet na iti militar agturong ti 2% (manipud 1%) ti gross domestic product na tapno “makibingay iti gastos” para iti “pananglapped ti agresyon ti China.”

Bayat a nagserbi ti Japan kas sekundaryo a kabinnadang nga imperyalista a bileg ti US, adda met ti kalkulado a risgo a mapapigsa daytoy dagiti monopolyo a kapitalista a Japanese nga agtartarigagay ti panagpalawa. Idi 2023, binalangkas ti Japan ti bukod na a plano a Free and Open Indo-Pacific tapno mapapigsa ti bukod a presensya a militar ken panagpalawa ti impluwensya na iti Asia kas imperyalista a pagilyan.

Gagem ti Japan nga igabsuon ti $75 bilyon a sobra a kapital na babaen kadagiti panagpuonan iti nadumaduma a proyekto nga imprastruktura kadagiti pagilyan iti South ken Southeast Asia. Naartapan na pay ti US ken China, ti Japan ti kadakkelan nga imperyalista nga agpupuonan iti rehiyon. Dumandanon iti $367 bilyon ti agdama a puonan daytoy kadagiti proyekto iti Southeast Asia pay laeng, kangrunaan iti Singapore, Vietnam ken Pilipinas.

Nauneg nga impluwensya ken kontrol iti Pilipinas

Idi panawen ti rehimen Aquino II, addan dagiti saritaan iti baet ti Pilipinas ken Japan tapno palubosan ti panagsanglad ken panagsardeng dagiti pwersa a Japanese iti pagilyan. Nupay kasta, idi laeng 2023 a pormal a narugian ti negosasyon iti panangbukel ti RAA. Binendisyunan daytoy ti US iti naangay a Trilateral Summit iti baet ti US, Japan ken Pilipinas idi Abril, nu sadinno a naipirmi ti panangiyaramid kadagiti pinagtipon a pagsasanay ti tallo a pagilyan iti South China Sea. Mano nga aldaw sakbay ti nasao a miting, inyaramid ti tallo a pagilyan ti kaunaan nga aggigiddan a panaglayag dagiti barko a panggubat iti West Philippine Sea.

Babaen ti RAA, palpalubosan ni Marcos ti Japan a papigsaen ti interbensyon na iti Pilipinas kasukat dagiti nagalusan na a ramit militar kas kadagiti pangsarbeylans a sistema a radar, kasta met dagiti kari ti panagpuonan ken pautang, a ti epekto na ket ti ad-adda laeng a panagbalin ti pagilyan a managsanggir iti gangannaet a kapital.

Linuktan met ti RAA ti saan pay a naglunit a sugat nga inbati ti brutal nga okupasyon ti Japan iti Pilipinas manipud 1942 agingga 1945. Dokumentado dagiti nakaam-ames a krimen iti gera nga inaramid dagiti tropa a Japanese. Kalatakan kadagitoy ti sekswal a panagadipen, nu sadinno a rinibo a babbai, ubbing ken bakla a Pilipino ti dinukot manipud kadagiti komunidad ken inbalud da kadagiti kampo militar tapno paulit-ulit a ramesen, tortyuren ken pabainan. Nabigbig dagiti biktima kas “confort women,” nga agingga ita ket mapapaidaman ti hustisya, agpada ti Japan ken ti reaksyunaryo nga estado a Pilipino. Iti laksid ti duron ti United Nations, saan pulos a naan-anay a binigbig ti Japan dagiti Pilipino a comfort women ken awan ti inted daytoy a kumpensasyon kadakuada uray maysa a sentimo.