Anaa na sa “hypermode” o mas taas nga yugto ang interbensyon sa imperyalistang US sa Asia niadtong Hulyo. Sugod Hulyo 25, unum ka mga nasud sa Asia ang gilibot sulod sa 10 ka adlaw ni State Sec. Antony Blinken (kalihim sa relasyong panggawas). Mibisita ug nakigpulong si Blinken sa Vietnam, Laos, Japan, Pilipinas, Singapore, ug Mongolia. Sumala sa pamahayag mismo sa US, ang tumong niini mao ang ipaabot sa mga “alyado” sa US nga ang komitment niini sa rehiyon nagpabiling “naputos sa puthaw” sa katapusang unum ka bulan sa administrasyon ni Pres. Joseph Biden. Nakatakda nang monaog si Biden human ang eleksyon sa US sa Nobyembre.

Sa Japan ug Pilipinas, kauban ni Blinken si Defense Sec. Lloyd Austin sa gitawag og 2+2 nga tigum sa ilang mga kaatbang nga ministro.

Sa Japan, giduso sa US ang pagdugang sa badyet pangmilitar niini sa “makasaysayanong ang-ang” aron pataason ang kapasidad militar niini batok sa komun nilang kaaway nga China. Lakip dinhi ang pagpalambo sa Japan sa mga armas nukleyar ilalum sa “nuclear deterrence” (pagpugong sa posibilidad sa gubat nukleyar). Gipalig-on usab sa US ang gitawag nga US Forces Japan sa Tokyo, nga mao ang sentro sa kumand sa militar sa US nga nagdumala sa dili moubos sa 120 ka aktibong base militar sa nasud. Kapin 55,000 ka tropang Amerikano ang permanente nga nakabase sa Japan.

Nakaabot si Blinken sa Pilipinas niadtong Hulyo 29 para sa mga tigum diplomatiko ug pangseguridad. Kini na ang iyang ikatulo nga pagbisita sa nasud sa miaging duha ka tuig. Niadtong Hulyo 30, sa unang higayon, gihimo sa Pilipinas ang 2+2 nga pulong, nga kanunay ginahimo sa US sukad niadtong 2012. Gipatawag nila Blinken ug Austin si Enrique Manalo, kalihim sa Department of Foreign Affairs, ug Gilberto Teodoro, kalihim sa Department of National Defense sa Pilipinas. Sa wala pa kini, gimiting sa duha ka upisyal sa US si Ferdinand Marcos sa Malacañang niadtong Hulyo 29.

Gihisgutan sa maong pulong ang plano alang sa paghimo sa General Security of Military Information Agreement. Unod sa maong kasabutan ang kuno “pag-inambitay” og sensitibong mga impormasyong militar sa duha ka nasud. Posibleng lain na usab kini ka dili patas nga kasabutang militar tali sa US ug Pilipinas, nga maglangkub lamang sa “sensitibong impormasyon” gikan sa Pilipinas. Himuon lamang niining pormal ang dugay nang interbensyon sa US sa mga internal nga isyu nga may kalabutan sa nasudnong seguridad sa Pilipinas.

Diri usab gianunsyo ni Austin ang paghatag sa US og $500 milyong ayudang militar (o foreign military financing) sa Pilipinas. Ang maong kantidad 12 ka beses nga mas daku kumpara sa $40 milyong kasagaran nga tinuig nga ayudang militar sa US sa Pilipinas. Gamiton kini sa “pagpalit” sa mga karaang armas ug mga sakyanang iggugubat, nga gustong ihan-ok sa US sa nasud sa takuban sa “modernisasyon” sa AFP. Tumong niining dugang pang ihikot ang Pilipinas sa heyopolitikal nga estratehiya sa US ug gamiton ang nasud isip lunsaran sa giandam nga gubat sa rehiyon. Gawas niini, gianunsyo usab ni Austin nga maggahin kini og $128 milyon alang sa konstruksyon sa dili moubos sa siyam ka base militar ilalum sa EDCA nga para sa eksklusibong gamit sa mga tropang Amerikano.

Gisugat sa mga protesta ang subling pagbisita ni Blinken ug Austin sa Pilipinas. Nagrali sa Camp Aguinaldo ang lain-laing mga grupong nasudnong-demokratiko niadtong Hulyo 30 aron makmakon ang rehimeng Marcos sa pagpasulod sa duha ka kriminal sa gubat sa nasud. Matud nila, responsable ang duha sa pagpanulsol og gyera sa lain-laing bahin sa kalibutan, ug sa pagduso sa henosidyo sa Palestine.

Gimakmak usab nila si Marcos sa iyang pagpanglimos ug pagyukbo sa duha ka imperyalistang ahente, pagtugot sa presensya sa mga langyawng tropa ug pagtahan sa soberanya sa nasud sa nagkadaghang “EDCA site” ug mga war games nga nagdala og kadaut sa panginabuhi sa mga tawo. Niadtong Hulyo 31, naglunsab usab og raling pinakilab ang kabatan-onan atubangan sa embahada sa US.

Sa Japan, susamang protesta usab ang gilunsad niadtong Hulyo 28 kadungan sa US-Japan 2+2 ministerial meet sa Tokyo. Panawagan sa mga aktibista sa Japan ug Pilipinas, “Blinken ug Austin, dili welcome!”