Nagsulod sa “hypermode” ukon mas masingki nga halintang sang pagpasilabot sang imperyalistang US sa Asia sadtong Hulyo. Sugod Hulyo 25, anum ka pungsod sa Asia ang ginlibot sa 10 ka adlaw ni State Sec. Anthony Blinken (tiglikom sa relasyon pangluwas). Nagbisita kag nakigsapol si Blinken sa Vietnam, Laos, Japan, Pilipinas, Singapore kag Mongolia. Suno sa pahayag mismo sang US, katuyuan sini nga ipalab-ot sa mga “alyado” sang US nga nagapabilin nga “naputos sa salsalon” ang komitment sini sa rehiyon sa ulihi nga anum ka bulan sang administrasyon ni Pres. Joseph Biden. Natalana na nga manaog si Biden pagkatapos ang eleksyon sa US sa Nobyembre.

Sa Japan kag Pilipinas, katimbang ni Blinken si Defense Sec. Lloyd Austin sa gintawag nga 2+2 nga pakigsinapol sa mga kapareho nila nga ministro.

Sa Japan, gintulod sang US ang pagpahabok sang badyet pangmilitar sini sa “makasaysayan nga lebel” para pataason ang ikasarang militar sini batuk sa komun nila nga karibal nga China. Kabahin diri ang pagpauswag sang Japan sang mga armas nukleyar sa tabon sang “nuclear deterrence” (pagpugong sang posibilidad sang isa ka nukleyar nga gyera). Ginpabaskog man sang US ang ginatawag nga US Forces Japan sa Tokyo, nga sentro nga kumand sang militar sang US nga nagadumala sa indi magnubo sa 120 ka aktibo nga base militar sang US sa pungsod. Masobra 55,000 ka tropang Amerikano ang permanente nga nakabase sa Japan.

Nag-abot sa Pilipinas si Blinken sadtong Hulyo 29 para sa mga diplomatiko nga sinapol kag pangseguridad. Ikatatlo na niya ini nga pagduaw sa pungsod sa nagligad nga duha ka tuig. Sadtong Hulyo 30, sa una nga higayon, ginhiwat sa Pilipinas ang 2+2 nga sinapol, nga sugod sang gin-umpisahan sadtong 2012 sa US permi ginahiwat. Ginsapol nila Blinken kag Austin sila ni Enrique Manalo, tiglikom sang Department of Foreign Affairs kag Gilberto Teodoro, tiglikom sang Department of National Defense sang Pilipinas. Antes sini, ginsapol sang duha ka upisyal sang US si Ferdinanad Marcos sa Malacañang sadtong Hulyo 29.

Gintalakay sa nasambit nga sinapol ang plano para sa pagdihon sang General Security of Military Information Agreement. Mangin unod sang nasambit nga kasugtanan ang kuno “pagpaambitanay” sang sensitibo nga mga impormasyon militar sa tunga sang duha ka pungsod. Segurado nga isa naman ini ka indi patas nga kasugtanan militar sa tunga sang US kag Pilipinas, nga magasakop lamang sa “sensitibo nga impormasyon” halin sa Pilipinas. Pagahimuon lamang sini nga pormal ang madugay na nga pagpasilabot sang US sa mga internal nga hambalanon nga may kaangtanan sa pungsodnon nga seguridad sang Pilipinas.

Diri man gin-anunsyo ni Austin ang paghatag sang US sang $500 milyon nga ayuda militar (ukon foreign military financing) sa Pilipinas. Ang kantidad nga ini ang 12 ka beses nga mas dako kumpara sa $40 milyon nga masami tuigan nga ayuda militar sang US sa Pilipinas. Pagagamiton ini sa “pagbakal” sang daan na nga mga armas kag salakyan pang-gyera, nga gusto itampok sang US sa pungsod sa tabon sang “modernisasyon” sang AFP. Katuyuan sini nga labi pa ihigot ang Pilipinas sa heyopulitikal nga estratehiya sini kag gamiton ang pungsod bilang lunsaran sang ginapangandaman sini nga gyera sa rehiyon. Gwa diri, gin-anunsyo man ni Austin nga magatigana ini sang $128 milyon sa pagatigayunon nga konstruksyon sang indi magnubo sa siyam ka base militar sa idalom sang EDCA nga para sa ekslusibo nga gamit sang mga tropang Amerikano.

Ginsugata sang mga protesta ang liwat nga pagbisita nila Blinken kag Austin sa Pilipinas. Nagpadulong sa Camp Aguinaldo ang nagkalain-lain nga grupo nga pungsodnon-demokratiko sadtong Hulyo 30 para batikuson ang rehimen Marcos sa pagpasulod sang duha ka kriminal sa gyera sa pungsod. Suno sa ila, responsable ang duha nga ini sa pagpangsulsol sang gyera sa nagkalain-lain nga bahin sang kalibutan, kag sa pagtulod sang henosidyo sa Palestine.

Ginbatikos man nila si Marcos sa iya pagpakilimos kag pagluhod-luhod sa duha ka imperyalista nga ahente, pagtugot sa presensya sang mga dumuluong nga tropa kag pagsungka sang soberanya sang pungsod sa nagadamo nga “EDCA site” kag mga war games nga nagahalit sa palangabuhian sang pumuluyo. Sadtong Hulyo 31, naglunsar man sang kalit nga rali ang pamatan-on sa atubang ang embahada sang US.

Sa Japan, may yara man sang kasubong nga protesta sadtong Hulyo 28 kadungan sang US-Japan 2+2 ministerial meet sa Tokyo. Panawagan sang mga aktibista sa Japan kag Pilipinas, “Blinken kag Austin, not welcome!”