![]( https://philippinerevolution.nu/wp-content/uploads/2024/09/20240901hi_RAA-primer-01-724x1024.png )
Halin sa brutal nga pagpanakup padulong sa pagpakuno-kuno nga alyado: (Primer) Nga-a kinahanglan pamatukan ang RAA sa tunga sang Pilipinas kag Japan?
Download here: PDF PDF (Black & White)
Ginpirmahan sadtong Hulyo 8, 2024 ang makaisa ka bahin nga kasugtanan militar sa tunga sang Pilipinas kag Japan nga Reciprocal Access Agreement (RAA). Nakahan-ay ini subong para ratipikahan ukon palig-unon sang Senado para mangin lubos nga tratado. Madamo na nga mga senador, lakip ang presidente sang Senado nga si Francis Escudero kag nagapostura nga “oposisyon” nga si Risa Hontiveros, ang nagakarakasa nga pirmahan ini. Ka-koros nila ang US sa paglibod sang kasugtanan bilang instrumento para sa “seguridad kag istabilidad” sa Asia. Lubos nila nga ginabalewala ang kasaysayan sang brutal nga pagpanakup sang Japan sa Pilipinas.
Paagi sa RAA, hatagan ligwa sang rehimen Marcos ang Japan nga magpabaskog sang ila pagpasilabot sa Pilipinas kabaylo sang paghatag sang mga kagamitan militar, subong man ang mga pangako sang pangapital kag pautang para sa mga neoliberal nga programa kag patakaran. Lubos man sini nga ginahigot ang pungsod sa imperyalistang alyansa nga mapang-gyera nga ginapamunuan sang US. Lubos sini nga wasakon ang ikasarang sang pungsod nga independyente nga igiit ang kaugalingon sini nga interes kag kawsa.
![](https://philippinerevolution.nu/wp-content/uploads/2024/09/Philippines-Japan-RAA-signing-July-8-2024-002.webp)
1) Ano ang RAA?
Ginhimo ang RAA para hatagan sang kahilwayan ang mga pwersa kag bilog nga militar sang Japan nga hilway nga maggwa-sulod bisan diin man nga bahin sang kadutaan, kahawaan kag kadagatan sang Pilipinas. Nangin sekreto ang negosasyon para diri. Bahin ini sang plano sang US kag mga alyado sini nga magpakat sang nagadamo nga nagadamo nga tropa sa mga pungsod sa Asia, magpwesto sang ila mga salakyan pang-dagat, magpatigayon sang mga paghanas kag paghanda sa gyera, kag higtan sang mas hugot ang Pilipinas sa mga alyansa militar nga ginapamunuan sang US.
Sa duso sang US, napinal ang kasugtanan sa sulod lamang sang pila ka bulan. Una ini nga gintilawan nga himuon sa panahon pa sang rehimen US-Aquino II (2010-2016). Apang natapna ini sa panahon sang rehimen Duterte nga nagapostura nga kontra-US para makaganansya halin sa binilyon ka dolyar nga mga kontrata sa China. Isa ang RAA sa lima pa ka kasugtanan militar nga ginsudlan sang Pilipinas sa subong nga tuig. (Tan-awa ang listahan.)
Sa bahin sang Japan, ang RAA ang una sa amo sini nga kasugtanan nga ginpirmahan sini kaupod ang isa pa ka pungsod sa Asia. May yara man ini sang RAA sa Australia (2022) kag UK (2023).
2) Paano sini maapektuhan ang sobereniya kag seguridad sang pungsod?
Indi malayo ang RAA sa mga Visiting Forces Agreement nga ginpirmahan sang Pilipinas sa tunga sini kag sang US sa hambalanon sa pagtapak sang sobereniya kag pagbutang sa peligro sa Pilipinas sa eksternal nga mga pamahog pang-seguridad.
Kasubong sang VFA, indi na kinahanglan nga magkuha sang visa kag magparehistro bilang “dumuluong nga bisita” sa mga ahensya sang estado sang Pilipinas ang nagabisita nga tropa kag sibilyan nga kontraktor sang Japan, subong man ang ila mga pamilya. Indi na gani kinahanglan magpakita sang pasaporte ang mga tropa kon may ara sila nga dala nga “defense service identity card” nga pirmado sang Japan.
Indi maathag nga nasulat sa kasugtanan kon ano ka dugay pwede magpabilin ang mga tropa sang Japan sa pungsod. Samtang yara sila sa sulod sang pungsod, wala sila nakapaidalum sa otoridad sang Pilipinas kag ang Japan ang nagadumala kag may kontrol sa ila tanan nga aktibidad.
Pwede nga “ipasulod, taguon kag gamiton” sang Japan ang tanan nga klase sang armas, amunisyon, eksplosibo kag makatalagam nga mga kagamitan sini sa sulod sang Pilipinas. Bisan may pagpakuno-kuno ang kasugtanan sa “paghalong” sa mga sibilyan nga komunidad kag kapalibutan, nasulat diri nga wala sang salabton ang magkatimbang nga bahin sa ano man nga “pagkaguba sa ano man nga propyedad, pagkapatay sang isa ka tropa ukon sang siblyan” tubtob ang mga ini nahitabo samtang nagapatuman sang mga hilikuton upisyal” (Artikulo XXIII, Numero 1, Letra A). Gani, wala sang salabton ang Japan sa ano man nga maguba sang mga tropa, gamit kag armas sini tubtob napasulod ang pagkaguba sa “gin-isa” nga mga aktibidad. Sa kasugtanan, pwede nga gamiton sang Japan ang tanan nga mga pangpubliko nga serbisyo, yutilidad kag pasilidad sa ano man nga unilateral ukon gin-isa nga aktibidad (Artikulo IX).
Bisan pa direkta ang lenggwahe sa kasugtanan angot sa “pagpaidalum sang mga tropa sa kriminal nga hurisdiksyon” sang sin-o man nga nakasala, (Artikulo XXI, Numero 2, Letra B), magapabilin pa gihapon ang “kinamatarung sa eksklusibo nga hurisdiksyon” sang Japan sa mga tropa sini kon ang mga krimen “indi sakup” sang laye sang Pilipinas ukon kon ang krimen batuk lang sa propyedad ukon seguridad sang Japan (Artikulo XXI, Numero 3, Letra A). Subong man, pwede “magdesisyon” ang Pilipinas nga indi magpaidalum sa hurisdiksyon sini ang sin-o man nga tropang Japanese nga ginpasakaan sang kriminal nga kaso, ukon indi gani maghatag sang “kunsiderasyon” (sympathetic consideration) sa ginapangayo sang Japan nga isungka (waive) ang hurisdiksyon sini sa amo nga mga kaso (Artikulo XXI, Numero 4, Letra C kag D).
Ang amo nga mga probisyon kaangay gid sang mga probisyon sang US-RP Visiting Forces Agreement nga gingamit para makalusot ang pila ka tropa nga Amerikano nga nakahimo sang krimen sa Pilipinas, halimbawa si US Marine Lance Cpl. Joseph Scott Pemberton nga nagpatay sa transgender nga si Jennifer Laude sadtong 2014 kag Marine Lance Cpl. Daniel Smith nga naglugos sa Pilipina nga si “Nicole” sadtong 2006. Pareho sa VFA kag iban pa nga makaisa ka bahin nga kasugtanan militar sang Pilipinas kag US, ganuyon sang RAA ang pungsod sa mga konplikto sang Japan tungod sa presensya sang mga tropa kag gamit militar sini sa pungsod.
![](https://philippinerevolution.nu/wp-content/uploads/2024/09/ZZZ_101118_mmanila_b_2018_10_11_15_28_56.jpg)
3) Nga-a ginduso sang US ang RAA?
Napasulod ang RAA sa Indo-Pacific Strategy sang US nga may nagapanguna nga katuyuan nga punggan ang paglapad sang kusog kag impluwensya sang China, ang komun nila nga karibal, sa Asia. Ginpirmahan ini sa konteksto sang ginpasingki nga mga operasyon militar sang Japan kag iban nga pungsod sa balayon sang Quad (Quadrilateral Security Dialogue) nga ginpamunuan sang US, kag sang nagadako nga papel sini sa mga paghanas kag paghanda sa gyera.
![](https://philippinerevolution.nu/wp-content/uploads/2024/09/Map-QUAD-bw.png)
Sa pagpangsulsol sang US sa nakaligad nga mga tinuig, ginpabaskog kag ginpalapad sang Japan ang ginatawag sini nga self-defense force bilang isa ka pwersang pang-gyera, butang nga lubos nga ginadumilian sa kaugalingon nga konstitusyon. Ginatulod sang US ang Japan nga pasakaan ang badyet sini sa militar tubtob 2% (halin 1%) sang gross domestic product sini para “makigbahin sa gastos” sa “pagpugong sa agresyon sang China.”
Ginagamit sang US ang Japan bilang nagapanguna nga butkon sini para ipatuman ang imperyalistang dominasyon sa Asia. Makita sa sulod sini ang indi magnubo sa 15 ka malapad nga base militar nga ginatawuhan sang 55,000 ka tropa nga Amerikno. Naka-istasyon sa Japan ang 7th Fleet, ang pinakadako nga forward-deployed fleet sang US Navy. Sa subong ginabug-os ini sang tatlo ka aircraft carrier (halin sa isa), 4-5 cruiser, 18-19 destroyer, 8 amphibious ship, 5 submarino, 9-11 logistics ship kag sobra sa 500 ka lain-lain nga tipo sang salakyan pang-kahawaan.
Sa una nga higayon sadtong 2022, gin-imbitahan sang US ang Japan sa pagsinapol sang North Atlantic Treaty Organization, kon diin nahimo sini ang pila ka baylateral nga kasugtanan sang baligyaanay sang armas kag gin-isa nga mga paghanas. Sining 2024, ginpatawag sang US ang duha ka lain-lain nga “trilateral nga pagsinapol” para hatagan sang mas dako nga papel ang Japan sa pagpasilabot sini sa South Korea kag Pilipinas.
4) Ano ang bentaha sang Japan sa RAA?
Samtang nagaserbe ang Japan bilang sekundaryo nga katimbang sang imperyalistang gahum sang US, may kalkulado man nga risgo ang US nga mapabaskog sini ang sulod sang mga monopolyo kapitalista nga Japanese nga nagahandum sang ekspansyunismo.
Sadtong 2022, ginhimo sang Japan ang National Security Plan kon diin napasulod ang programa nga Official Security Assitance (OSA). Kasubong sang Official Development Assistance (ODA) sini, alagyan ang OSA sang sobra nga kapital kag gamit-militar sang Japan padulong sa iban nga pungsod sang Asia. Ang OSA mga pautang para ibakal sang naga-utang nga pungsod sang mga makina, salakyan, nanari-sari nga produkto kag ikasarang nga Japanese. Sang sunod nga tuig, ginbalay naman sang Japan ang kaugalingon nga plano nga Free and Open Indo-Pacific para hatagan sang dagway ang pagpabaskog sang kaugalingon nga presensya militar kag pagpalapad sang impluwensiya sa Asia bilang imperyalista nga pungsod.
Sa idalum sang programa nga OSA, target sang Japan nga himuon nga bulubuan sang kapital kag gamit-militar ang Pilipinas, Vietnam kag Singapore. Isa sa mga una nga kontrata sini ang pautang sa Pilipinas para ibakal sang lima sini ka barko pang-patrol. Ang mga barko nga ini gamiton sang Philippine Coast Guard para “bantayan” ang kadagatan kaupod ang mga pwersa nga Amerikano, Japanese kag Australian.
Guwa sa OSA, plano sang Japan nga magbubo sang tubtob $75 ka bilyon nga sobra nga kapital sini sa dagway sang pangapital sa lain-lain nga proyektong imprastruktura sa mga pungsod sa South kag Southeast Asia. Labaw pa sa US kag China, Japan ang pinakadako nga imperyalista nga nagapangapital sa South kag Southeast Asia. Nagalab-ot sa $367 ka bilyon ang subong nga pangapital sini sa mga proyekto sa Southeast Asia pa lang.
Ang Japan ang numero uno nga katimbang sa baligyaanay sang Pilipinas sadtong 2023 kag pinadako nga ginahalinan sang dumuluong nga pangapital sang pungsod sang nakaligad nga tinuig. Gina-proteksyunan sang Japan ang mga komersyal nga interes sini sa pungsod paagi sa makaisa ka bahin nga Japan-Philippines Economic Partnership Agreement (JPEPA). Ginahatagan kahilwayan sang kasugtanan nga ini ang paghimulos sang Japan sa mga rekurso kag barato nga kusog pangabudlay sang mga Pilipino, samtang gina-obligar ang Pilipinas nga panubuon ang mga taripa sang mga produkto nga Japanese kag kakason ang nabilin nga mga proteksyon sa lokal nga industriya kag agrikultura.
Nabubo ang kapital sang Japan (sa dagway sang mga pautang) sa grandyoso nga mga proyekto nga imprastruktura, mayor sa mga riles kag dalan, nga nagpalayas sang pila ka gatos nga mga komunidad, naghalit sa palangabuhian sang linibo ka imol kag nagwasak sa kapalibutan. May salabton man ini sa paglala sang sistema sang transportasyon nga dulot sang pagduso sini sang peke nga modernisasyon nga nagpalayas sang mga tradisyunal nga dyip sa kadalanan. Imbolbado ini sa mapangkawkaw nga mga proyekto para sa renewable energy, samtang numero uno nga tigpangapital sa mga planta nga karbon kag LNG nga mapanghalit sa kapalibutan kag may kasal-anan sa paglala sang climate change.
5) Nga-a pagtraidor sa Pilipinas ang pagsulod sang rehimen Marcos sa RAA?
Sa pinaka-una nga higayon halin sang matapos ang Ikaduha nga Inaway Pangkalibutanon, pahanugutan sang RAA ang pagpasulod kag pagpabilin sang mga tropa sang imperyalistang Japan sa pungsod. Sa tunga sang 1942 kag 1945, kon diin brutal nga ginsakup sang Japan ang Pilipinas, ginpatigayon sang mga tropa sini ang madamuan nga pagpamatay, tortyur kag kapintas sekswal. Sa tantya sang mga eksperto sa kasaysayan, yara sa mga 90,000-300,000 nga mga Pilipino nga sibilyan ang ginpamatay sang mga tropa nga Japanese sa panahon nga ini. Isa sa pinakamakasiligni nga hitabo ang Battle of Manila halin Pebrero tubtob Marso 1945, kon diin ginatos ka libo ang ginpatay kag ginatos ang ginlugos sang mga tropa nga Japanese.
Isa sa wala pa nag-ayo nga pilas nga ginbilin sang brutal nga pagpanakup ang kawad-on sang hustisya sa mga biktima sang pagpang-ulipon sekswal sang pwersang Japanese. Linibo ka kababaenhan, bata kag agi nga Pilipino ang gindukot halin sa ila mga komunidad kag ginpriso sa mga kampo militar para pasulit-sulit nga lugoson, tortyuron, kag pakahuy-an. Ginkilala ang mga biktima bilang mga”comfort women.” Sa pihak sang duso sang United Nations, wala bisan kasan-o man bug-os nga ginkilala sang Japan ang mga Pilipino nga comfort women kag wala ini sang may ginhatag nga kumpensasyon bisan isa ka sentimos sa ila.
Sa atubang sang nagasingki nga pagpasilabot sang US kag Japan sa Pilipinas, kag pag-ganoy sang mga ini sa ginasulsolan nga imperyalistang gyera batuk sa Tsina, mabaskog nga ginapamatukan sang pumuluyong Pilipino ang makaisa ka bahin nga RAA. Ginakundena nila ang rehimen Marcos kag mga kakunsabo sini sa Senado sa pagtraidor sa pumuluyong Pilipino.
Sa semana sang ginpirmahan ang kasugtanan, gilayon nga nagpahayag sang pagpamatuk ang mga grupo nga pungsodnon-demokratiko batuk diri. Nagpadulong sila sa embahada sang Japan para ipalab-ot ang ila reklamo. Lakip sa mga nagpalab-ot sang mabaskog nga pagpamatuk ang Lila Pilipina, isa ka organisasyon sang mga comfort women nga gintukod sadtong 1994. Pila na lang ang nabilin sa ila sa subong.
![](https://philippinerevolution.nu/wp-content/uploads/2024/09/comfort-women.webp)
Madugay na nga ginaduso sang mga grupo kag mga progresibo nga kongresista ang pagpasulod sang estorya sang comfort women sa edukasyon para indi malubong sa pagkalipat ang brutalidad sang pagpanakup sang Japan. Tubtob sa subong, wala ini ginasabat sang reaksyonaryong estado, kag kabaylo pilit pa nga ginalubong sa pagkalipat.
![](https://philippinerevolution.nu/wp-content/uploads/2024/09/20240708.bayan-protest-japanese-embassy.jpg)
Pamatukan ang Japan-Philippines Reciprocal Access Agreement!
Pakigbatuan ang mga probokasyon sang gyera sang US!
_____
Ginhanda sang:
Departamento sa Impormasyon
Partido Komunista ng Pilipinas
Setyembre 2024