Nabigo ng pagkakaisa at barikada ng mga residente ng Mayhaligue Street sa Barangay 262 at 264 sa Zone 24, Tondo, Manila ang demolisyon na inilunsad ng mga pwersa ng estado noong Mayo 26. Giit ng mga residente, walang ligal na batayan at labag sa kanilang mga karapatan ang demolisyon.

Sa harap ng ilampung mga pulis na mayroong batuta at truncheon na gumagamit ng water cannon at iba pang tipo ng karahasan, matapang na nagtanggol ang mga residente para sa kanilang karapatan sa paninirikan. Naiulat ang pag-aresto sa apat na mga residente sa kasagsagan ng gitgitan.

Nakiisa sa barikada at nagpaabot ng suporta ang mga lider ng Kalipunan ng Damayang Mahihirap (Kadamay) at grupo ng kabataan na Anakbayan. “Mariing kinukundena ng Kadamay ang marahas at iligal na demolisyon…na isinagawa sa kabila ng pagtutol ng mga residente,” pahayag ng Kadamay.

“Tagumpay ang sama-samang paglaban ng mga mamamayan ng Mayhaligue, Tondo para sa kanilang karapatan sa paninirikan,” pahayag ni Mhing Gomez, pambansang tagapangulo ng Anakbayan at nakiisa sa barikada. Nanawagan ang grupo ng patuloy na suporta laluna at posibleng ituloy sa susunod na mga araw ang demolisyon.

Ayon sa pamunuan ng Kapitbahayan ng Mayhaligue Neighborhood Association Inc., mahigit 400 na pamilya ang maapektuhan o halos 2,000 na indibidwal ang mawawalan ng tahanan sa planong demolisyon. Kabilang sa mga ito ang ilampung mga bata, matatanda, mga buntis at may kapansanan na lubhang masasapanganib ng demolisyon.

Ang lupang kinatitirikan ng mga bahay ay inaangkin ng kumpanyang 2288 Ethan Realty Corporation. Sa rekord ng Securities and Exchange Commission, nagrehistro laman ang kumpanya noong 2021.

Paninindigan ng mga residente, dekada 1930 pa nang nagsimulang manirahan ang karamihan sa kanila sa Mayhaligue Street. Liba pa iginiit nlang wala silang natatanggap na pabatid, atas ng korte at planong relokasyon na pawang kinakailangan para sa pagpapatupad ng demolisyon alinsunod sa batas.

“Isang bahagi lang ito ng mga serye ng demolisyon at panununog sa mga maralitang komunidad sa buong bansa na nangyayari sa ilalim ng rehimeng Marcos Jr,” ayon sa Kadamay. Naninindigan ang militanteng sentro ng mga grupo ng maralita na ang paninirahan ay isang batayang karapatan at dapat tiyakin ng estado.

Bilang bahagi ng pagtutol sa demolisyon, kaagad nagsampa ang mga residente noong Mayo 26 ng hapon ng Petition for Certiorari at panawagan para sa temporary restraining order (TRO) sa Regional Trial Court sa Maynila. Noong Mayo 27, kinatigan ng korte ang TRO at pansamantalang ipinatigil ang planong demolisyon.

Ayon sa Kadamay, hindi makatarungan at hindi pwedeng patuloy na itulak sa kawalan ang mga maralita habang ibinibenta ang lupa sa malalaking negosyante’t debeloper ng lupa. “Ang panawagan ng mga residente ng Mayhaligue: Tutulan, labanan, at wag pahintulutan ang demolisyon sa Mayhaligue!” anang grupo.