Simple, pero makabuluhan ang matagumpay na paglulunsad ng Bagong Hukbong Bayan (BHB)-Quezon (Apolonio Mendoza Command) ang isang istilong kapehan na pagdiriwang ng ika-56 na anibersaryo ng Partido Komunista ng Pilipinas sa isang larangan sa South Quezon-Bondoc Peninsula (SQBP).

Nagsilbi rin itong pagkakataon para parangalan ang mga martir ng Quezon sa nakaraang taon partikular si Divine “Ka Zoe” Sureta at Paolo “Ka Isko” Cruz na nagbuwis ng kanilang buhay noong Marso 28, 2024 sa bayan ng Guinayangan. Nagbigay ng pahayag ng pakikiisa ang mga bisitang dumalo na nagmula sa mga alyadong samahan ng National Democratic Front of the Philippines (NDFP) kagaya ng Kabataang Makabayan at Artista at Manunulat para sa Sambayanan.

Bago pa ang Kapehan ay nagbasa at nag-aral ang Pulang hukbo ng pahayag ng Komite Sentral at mensahe ng Kalihiman ng Komiteng Tagapagpaganap ng Komiteng Rehiyon ng Partido sa Southern Tagalog sa anibersaryo ng Partido. Pinagtibay ng mga pahayag at mensahe ang panawagang Magwasto at Sumulong! na siya ring tema ng Kapehan.

Parte rin ng selebrasyon ang pagsasalo-salo sa kaunting handang pagkain, bahaginan ng karanasan sa nagdaang taon, pagbuburda, pagdodrowing, kantahan at pagbabasa ng ilang librong Marxista-Leninista-Maoista.

Sa matagumpay na pagdiriwang ng anibersaryo ng PKP, napabulaanan muli ang deklarasyon ng rehimeng US-Marcos II na may iisa na lamang na mahinang larangang gerilya sa bansa. Nabigo ang patuloy na nag-ooperasyong tropa ng Armed Forces of the Philippines at Philippine National Police sa itinuturing nilang “insurgency-free” na lalawigan ng Quezon.