Inulan ng kabi-kabilang pagbatikos ang brutal na paglabag ng Zionistang Israel sa tigil-putukan sa pagitan nito at ng Hamas, at ang maramihang pagpaslang nito sa Gaza noong Marso 18. Sa tindi ng krimen, nagpahayag ng pagkundena ang mga bansa sa Middle East at Latin America, at kahit ang maka-Zionistang mga gubyerno sa Europe.

Sa loob lamang ng 24 oras sa araw na ito, hindi bababa sa 404 Palestinians ang pinatay at 562 ang nasugatan sa mga pamboboma ng Israel sa matataong lugar sa Gaza. Hindi bababa sa 174 sa kanila ay mga bata. Ang araw na ito ay kilala ngayon bilang isa sa pinakamadugong araw sa kasaysayan ng brutal na okupasyon ng Zionistang Israel sa lupain ng mamamayang Palestino. Kasabay ng pambobomba, muling hinarang ng Israel ang pagpasok ng makataong ayuda sa daan-daanlibong Palestino na matagal nang dumaranas ng matinding gutom at krisis sa kalusugan.

Gamit ang mga bomba at eroplanong sinuplay ng US, isinagawa ng Israel ang matindi at malawakang pambobomba mula umaga ng Marso 18, habang papagising pa lamang ang maraming Palestino. Pinuntirya ng mga eroplanong pandigma at drone ang mga residensyal na lugar. Buu-buong mga pamilya ang namasaker.

Sa ulat ng Gaza Ministry of Health, mahigit 61,700 na ang pinatay sa pinaarangkadang henosidyo ng Israel mula 2023, kabilang ang 17,500 na nawawala at pinaniniwalaang napatay. Mahigit 110,000 mamamayan naman ang dumanas ng pinsala sa katawan.

Kabilang sa nagkundena sa pinakabagong brutalidad ng Israel sa Gaza ang Partido Komunista ng Pilipinas.

“Ang pagbali ng Israel sa tigil-putukan at malawakang pamamaslang nito sa Gaza ay bahagi ng patakaran ng Zionistang estado para palayasin ang mga Palestino sa sarili nilang lupa, at supilin ang kanilang karapatan sa sariling pagpapasya,” pahayag ni Marco Valbuena, upisyal sa impormasyon ng PKP.

Ang mga pang-aatake ay may buong suporta ng US. Ayon sa gubyernong Trump ng US, ang pambobomba noong Marso 18 ay ipinagpaalam ng Israel. Kamakailan lamang ay nag-awtorisa si Trump na ituloy ang pagdeliber ng mahigit $3 bilyong halaga ng mga bomba, misayl at iba pang armas na binili ng Israel.

Bago ang Marso 18, pinahina na ng US ang tigil-putukan nang sinuportahan ni Trump ang wala-sa-usapang kundisyon ng Israel na palayain ng Hamas ang lahat ng bihag, na salungat sa napagkasunduan sa antas-antas na tigil-putukan. Una nang nagpahayag si Trump na nais niyang “ariin” ang Gaza, isang paalala sa tunay na layunin ng US na kontrolin ang Middle East at angkinin ang mga rekurso nito.

Alinsunod dito, pinaarangkada rin ni Trump ang pambobomba nito sa Yemen, na malaon nang nagsasagawa ng mga aksyon bilang suporta sa maamamayang Palestino.