Tinuligsa ng Karapatan ang patuloy na tinawag nitong “judicial harassment” ng National Task Force (NTF)-Elcac laban sa kanilang mga upisyal at sa mga lider ng Rural Missionaries of the Philippines (RMP) at Gabriela. Kaugnay ito ng panibagong tangka ni Ret. Gen. Hermogenes Esperon Jr at ng NTF-Elcac na mag-apela sa Court of Appeals noong Disyembre 2024 para baligatin ang pagbasura ng mga korte sa mga kasong perjury na isinampa sa kanila noon pang 2019.

Noong Enero 2023, apat na taon mula nang isinampa ang kaso, ipinawalang-sala ni Judge Aimee Marie B. Alcera ng Quezon City Metropolitan Court Branch 139 sa kasong perjury ang 10 na mula sa Karapatan, RMP, at Gabriela. Ang kasong perjury ay pumapatungkol sa pagsisinungaling o pagsasabi ng hindi totoo sa isang sinumpaang salaysay.

Tumanggi si Esperon na kilalanin ang desisyon ng korte at inakusahan ang huwes na “umabuso sa kanyang diskresyon.” Nagsampa ng motion for reconsideration si Esperon at NTF-Elcac noong Marso 2023 na sa katapusan ay pinagtibay ang naunang desisyon ng korte. Kasunod na dinala ni Esperon ang kaso sa Regional Trial Court noong Pebrero 2024 at muling pinagtibay ng korte ang desisyon. Noong Disyembre 2024, muli silang nag-apela.

“Matapos mahadlangan sa kanilang mga pagtatangka na baligtarin ang pagwawalang-sala sa antas ng MTC at RTC, nagtungo na sila sa Court of Appeals,” pahayag ng Karapatan. Tinawag ng pangkalahatang kalihim ng Karapatan na si Cristina Palabay ang hakbang bilang “desperasyon.”

“[Si Esperon] at ang kanyang kabal sa NTF-Elcac ay mayroong obsesyon na usigin kami, at hibang sa pag-iisip na magtatagumpay sila, sa kabila nang pagkatalo nila sa bawat hakbang sa kawalan ng merito,” ayon pa kay Palabay. Pagdidiin pa ng grupo, paglulustay lamang ito sa pondo ng publiko at pagsasayang ng oras ng korte.

Tinuligsa ni Palabay ang nagpapatuloy na panggigipit na ito laban sa kanilang mga tagapagtanggol ng karapatang-tao. “Ipinapanawagan namin na wakasan ang mga pag-atakeng ito at idinidiin ang panawagan na buwagin ang NTF-Elcac,” pahayag ni Palabay.