Dagdag sa patong-patong nang pagtaas ng singil at presyo pagpasok ng taon ang plano ng Light Rail Manila Corporation (LRMC), ang kumpanyang nagpapatakbo sa serbisyong LRT sa Maynila, na itaas ang pamasahe dito nang hanggang ₱12.50 kada byahe. Tinawag ang planong pagtaas na “walang puso” ni Ferdinand Gaite ng Bayan Muna sa gitna ng laganap na kahirapan ng mamamayan. Aniya, malinaw na walang pakialam ang kumpanya sa kalagayan ng mamamayan.

“Humihingi ito (LMRC) ng pagtaas ng pamasahe na aabot hanggang ₱12.50 bawat biyahe habang 63% ng mga pamilyang Pilipino ay nahihirapang tustusan ang kanilang pang-araw-araw na gastusin,” ayon kay Gaite.

Sa panukala ng LRMC, tataas nang ₱8.65 ang pamasahe para sa maiiksing byahe, ₱6.02 para sa katamtamang byahe at ₱12.50 para sa malayuang byahe. Sa gayon, tataas mula ₱45 tungong ₱60 ang maksimum na pamasahe sa LRT.

“Hindi ito mga simpleng numero,” ayon sa mambabatas. “Para sa mga sumasahod ng minimum na umaasa sa LRT araw-araw, nangangahulugan ito ng mas kaunting pagkain sa mesa, mas kaunting pera para sa mga pangunahing pangangailangan.” Noong nakaraang taon, nagtaas rin ng singil ang LRMC.

Lumahok si Gaite, kasama ang mga kandidato pagkasenador ng Makabayan na sina Jerome Adonis, Mimi Doringo at Mody Floranda sa pagdinig ng Department of Transportation na isinagawa ngayong araw kaugnay sa plano ng LMRC.

“Nanawagan kami sa DOTr na tanggihan ang kontra-mahirap na petisyong ito. Dapat naghahanap ang gubyerno ng paraan para pagaanin ang pasanin ng mamamayang Pilipino, hindi dinaragdagan ang kanilang kahirapan. Ang pampublikong transportasyon ay serbisyo, hindi luho,” aniya.

Ang tantos na 63% na kahirapan ay batay sa sarbey na ginawa ng Social Weather Station (SWS) noong Disyembre. Ayon sa SWS, tuluy-tuloy na tumaas ang “self-rated poverty” noong 2024, mula 46% noong Marso 2024, tungong 58% noong Hunyo at humantong sa 63% sa Disyembre, na pinakamataas mula 2009. Ang abereyds na tantos para sa buong 2024 ay 57%, mas mataas nang 9% sa 48% noong 2023 at 2022.