Napilitang ipagpaliban ng mga manggagawa ng Nexperia at unyon nitong Nexperia Workers Philippines Inc. Workers Union (NWPIWU)-NAFLU-KMU ang isasagawa sanang “strike vote” o pagboto para sa welga ngayong araw dulot ng panggigipit at tahasang pakikialam ng maneydsment at mga tauhan nito sa aktibidad ng unyon. Noong Hunyo 26, inihain ng unyon ang Notice of Strike (NOS) sa National Conciliation and Mediation Board (NCMB) Region IV-A sa Calamba, Laguna.

Nagdesisyon ang unyon na maghain ng NOS dahil sa di makatarungang mga kundisyon sa paggawa tulad ng pagtatanggal sa mga upisyal ng unyon, pansamantalang pagtanggal sa mga kasapi ng unyon at paglabag sa mga prubisyon na nakasaad at napagkasunduan sa Collective Bargaining Agreement.

Sa pahayag ng NWPIWU-NAFLU-KMU, ginipit ang kanilang botohan sa pamamagitan ng kung anu-anong kundisyon na inilatag ng maneydsment sa paggamit ng pasilidad ng kumpanya. Kabilang sa mga hindi makatarungang kundisyon nito ang ID tapping, stamping sa balota at pagtatalaga ng mga kinatawan ng maneydsment sa botohan.

Mahigpit na tinuligsa ito ng mga manggagawa dahil labag ito sa kanilang mga karapatan bilang manggagawa at ng kanilang unyon. Tinanggihan ng unyon ang ID tapping dahil magagamit ito sa pag-profile sa mga manggagawang boboto. Tinutulan nila ang pagtatalaga ng kinatawan ng kumpanya dahil purong aktibidad ng unyon ang botohan at walang kinalaman ang maneydsment.

Anang unyon, “kung sa usapin ng integrity ng eleksyon ay may presensya ng RCMB, pinayagan din ng unyon na nakapirma sila sa balota.” Malinaw umanong pakikialam ng kumpanya sa unyon ang mga kundisyon na ito. “Ayon sa batas dapat ay bystander lang sila at hindi dapat nakikialam sa ating unyon,” pahayag pa nito.

Dahil dito, nagdesisyon ang unyon na ipagpaliban at ilipat ang araw ng petsa ng botohan. “Nakikita natin sa management ang pangamba dahil sa pinapakita ng mga manggagawa na malakas at solidong pagkakaisa para ipagtanggol at ipaglaban ang kinabukasan at kabuhayan kahit abutin natin ang pinakamataas na pagkilos, ang welga!” pagdidiin ng unyon.

Nagpaabot naman ng suporta ang pederasyong National Federation of Labor Unions-Kilusang Mayo Uno, kinabibilangan ng unyon, sa desisyon ng mga manggagawa. “Takot [ang kumpanya] sa kakayahan ng mga manggagawang ipatigil ang produksyon na magbubunsod ng pagkawala ng tubong pinoprotektahan nila gamit ang tanggalan,” ayon sa pederasyon.

Hinimok nito ang lahat ng mga myembro ng NPIWU na bumoto ng ‘yes’ sa isasagawang strike vote sa hinaharap.

Samantala, nagsagawa ng protesta ang unyon kahapon sa labas ng Light Industry and Science Park 1 sa Barangay Diezmo, Cabuyao, Laguna kung saan nakapaloob ang kumpanya. Paghahanda nila ito sa strike vote.