Sadtong Enero 18, 2023 alas 4:30 sang hapon, nagluntad ang isa ka engkwentro sang ASJC-NPA kag 15th IB sang AFP sa Sitio Malipayon, Barangay San Jose, Sipalay City. Sa nahitabo nga engkwentro, 3 ang napatay kag 7 ang pilason sang 15th IB human nga aktibo nga nakuha ang inisyatiba sang mga pula nga hangaway.

Masobra 10 minutos ang ginlawigon sang inaway kag luwas man nga nakamaniobra ang mga NPA nga wala man sang nahalitan.

Militarista nga lockdown, ginpatuman

Human sang engkwentro ginpatuman sang AFP ang militarisado nga lockdown sa Sitio Tabon-tabon kag Sitio Malipayon sang Barangay San Jose, Sipalay City kag halos bilog Barangay Baclao sang Cauayan. Halos 200 ka mga pamilya nga may ara masobra o kon kulang 500 ka mga indibidwal ang ginpabakwit sa mga lapit nga eskwelahan kag Barangay Gym. Bangud sini, naapektohan ang mga pangabuhian kag kahayopan sang pumuluyo. Ginabawalan sila na mag-uma, mubalik sa ila panimalay kag mugawas sang ila sitio. Iligal man nga ginausisa sang mga militar ang mga pinamakal sang pumuluyo kag ang mga berdugo nga militar ang nagtinir sa mga panimalay sang pumuluyo. Ang bilog nga ini walay iban nga ginbunga kundi ang kahadlok kag kakugmat sang pumuluyo.

Peke nga engkwentro

Indi matuod ang ginpagguwa sang 15th IB sang AFP nga may isa pa ka engkwentro nga nagluntad sa Barangay Camalandaan, Cauayan. Mga sibilyan ang ila gintiro kag ginpagguwa lang nga isa ka engkwentro. Ini nagapamatuod nga wala ginakilala sang AFP ang kinatuhay sang sibilyan kag armado. Sila ang matuod nga berdugo kag tigpatalang sa pumuluyo.

Ang ASJC-NPA hugot nga nagkundena sa paglapas sa tawhanon nga kinamatarung sang mga sibilyan, sa militarisado nga paglockdown, kag sa pagpaniplang sang AFP.

Ginapanawagan ang tanan nga pumuluyo nga maghiliusa kag ibuyagyag ang kalakasan kag pagpamintas sang berdugo nga 15th IB. Samtang ang ASJC-NPA andam nga mangapin para madepensahan ang kabuhi kag pangabuhian sang masang pigos kag ginhimuslan kag hatagan hustisya ang mga biktima sang pasista nga militar sa ila padayon nga paglapas sa tawhanon nga kinamatarung.