Bisan pa man nga may lain na nga nagbulos nga kumander sang 94th IB, wala sang kinatuhay ang mga mando sini sang iya ginsundan. Pareho lang sila nga ido-ido sang US-Marcos Jr nga rehimen nga amo ang numero uno nga makinarya sa estado nga nagatuga sang terorismo sa mga komunidad paagi sa pagpatuman sang National Action Plan for Unity, Peace, and Development (NAP-UPD), isa ka kontra-rebolusyonaryo nga kampanya nga nagatarget man sa mga sibilyan.

Gani, sadtong Hunyo 28, 2026 tubtub subong, nakita ang presensya sang mga berdugo nga tropa militar sa Sityo Anser. Nagdugang man sila sang pwersa sadtong Hulyo 04 sang nagtaklad ang isa ka rio nga gin-ula sa Sityo Bonton, sakop gihapon sa amo nga barangay.

Ginaimbestigar nila ang tanan nga mga residente nga ila natabuan sa dalan kag ginasaka ang tanan nga balay para kuhaan sang mga personal nga impormasyon nga pwede nila magamit para sa pagpressure sang mga pumuluyo nga mangin aset nila sa lugar.

Samtang sa Barangay Santol, Binalbagan, wala untat ang pakadto-pakari sa mga pasistang militar sa erya. Subong, may ara 3 ka tapok sa barangay kon diin ang 1 ka tapok nga may 2 ka regular army kag 6 ka CAFGU ang nagabantay sa ekwipo nga ginagamit sa paghimo sang kalsada sa barangay. Samtang sako ang iban sa Sitio Omot, Barangay Santol sa pagpamahug sa mga tawo agud ma-recruit sila sa CAFGU.

Dako man ang papel ni Kapitan Boy Dorimon sa pagpatukod sa detatsment nga nahamtang sa Sitio Omot. Ginareklamo siya sa mga residente bangud ginapressure man sila sang ila kapitan nga magpartisipar sa pag-obra sa detatsment. Sa matuod, indi man gusto sang mga pumuluyo sa Barangay Santol nga butangan sang detatsment ang lugar bangud ini ang magadala sang kagamo sa ila lugar. Magluwas nga lehitimo nga target ini sang mga pulang hangaway, ang mga army man mismo ang nagasige inom sang makahulubog mga ilimnon kag nagamaoy pagkatapos. Nagapalupok sila pusil nga nagatuga sang troma sa pumuluyo kag nagapalapnag sang mga anti-sosyal nga mga aktibidad.

Sa Sityo Mag-anay, Barangay Biao, Binalbagan, ginareklamo man sa mga pumuluyo ang mga militar nga nagapabaya lang sa ila mga ido nga nagapangaon sang sapat nga timbang sa pangabuhi sang mga pumuluyo.

Sa pihak sini tanan, kinahanglan nga maghiusa ang mga pumuluyo sa pagdemanda nga untaton ang militarisasyon sa kabukiran kag palayason ang mga militar nga gapangguba sang ila pangabuhian.