Lubos nga ginpaslaw sang mga yunit sang Leonardo Panaligan Command-New People’s Army ang kubkob kag dumog nga atake sang kumbinado nga tropa sang 62nd IB kag 94th IB sa mga binukid sang Guihulngan City, La Libertad kag Canlaon City sa Negros Oriental kag Moises Padilla, Isabela kag Binalbagan sakop sang Negros Occidental sugod sadtong Hunyo 16 tubtob temprano nga bahin sang Hulyo. Ini ang aktwal nga implementasyon sang militaristang National Action Plan for Unity, Peace and Development (NAP-UPD) sang rehimeng US-Marcos Jr batok sa ginapatihan nga baseng masa sang NPA. Taktika sang pasistang militar ang ginpagamay kag madamo nga yunit sini nga ginpakat sa nasambit nga mga lugar para ipiton kag lagson ang mga yunit sang Pulang hangaway sang banwa paagi sa pokus nga operasyon militar.

Samtang nagasingki ang operasyon militar sa Central Negros sa larangan gerilya, surpresa nga naunahan lupok sang isa ka yunit sang LPC-NPA ang isa ka gamay nga blocking force sang 62nd (7 elements) sa Sityo Balingos, Barangay Hinakpan sakop sang Guihulngan City ala 1:30 sang hapon sang Hulyo 1 samtang nagamaniobra ang yunit sang NPA paggwa sa mga kolum nga nagapalibot sa lugar. Lima ka metros ang distansya sang dungan nga ginpalukpan sang NPA ang nakapundo nga tropa militar. Patay gilayon ang isa ka tropa militar kag 3 ang mga napilasan samtang ang iban ang nagdinalagan pataklad sa sidlangan nga bahin sang lugar. Agud hinabunan sang militar ang ila kahuy-anan, hungod nila nga gintago sa publiko ang ila kaswalti sa natabo nga inaway.

Mabaskog man nga ginakondenar sang LPC-NPA, ang patarasak nga pagpinalupok sang mga nerbyuso nga militar nga wala naman sang kontra sa Sityo Balingos, Barangay Hinakpan, Guihulngan alas 5:40 sang kaagahon Hulyo 1. Ini ang naghatag sang kakugmat sa mga residente sa lugar. Nagalapas sa tawhanon nga kinamatarung kag international humanitarian law ang pagmando sang militar sa mga residente nga indi maggwa sa ila mga panimalay matapos ang insidente sa sulod sang isa ka adlaw. Ginpunggan man sang militar ang mga mangunguma nga magtrabaho sa ila mga uma sini nga panahon samtang nagatiner naman ang pasistang tropa sa ila mga panimalay nga labi nga nagaperwisyo sa mga pumuluyo sa lugar.

Ginpanawagan sa tanan nga pumuluyo sa Central Negros nga hugot maghiusa agud hublasan ang mga pang-abuso militar kag pamatukan ang pasismo sang estado kag sukton ang rehimeng US-Marcos sa iya mga kahalitan sa malapad nga pumuluyong Pilipino.

Ginamanduan sang Leonardo Panaligan Command-New People’s Army ang tanan nga yunit sang NPA nga pangapinan ang kinamatarung kag interes sang malapad nga masa sang pumuluyo paagi sa matinugahon nga pagpukaw, pag-organisa kag pagpahulag sa masa ilabe na sa paglunsar sang madinalag-on nga taktikal nga opensiba gikan sa lubos nga suporta sang pigos kag ginahimuslan nga pumuluyong Negrosanon. ###