Translation: English

Hugot nga gikondena sa NDFP- NEMR ang pagpatay na usab sa duha ka yanong sibilyan sa Surigao del Norte, usa sa Surigao del Sur ug laing usa sa Agusan del sur.

Gikataho nga niadtong Nobyembre 25, gipusil-patay si Ignacio Arevalo sulod sa iyang panimalay sa Purok 13, Brgy. Mat-i , Surigao City. Si Arevalo, purok tsirman ug usa ka lider sa NAGAMI nga asosasyon sa gagmay’ng minero.

Gisaka sa pwersa sa 29th IBPA ug PNP sa tungang gabii ang balay ni Arevalo, giposasan siya, gidala sa kusina sa iyang balay ug didto gipusil. Pag-abot sa alas 3 sa kaadlawon mao pa niabot ang SOCO unit sa PNP-Surigao City uban ang taga-media ug usa ka kagawad sa Brgy. Mat-i. Migawas na dayon ang balita nga napatay ang usa ka membro sa BHB sa iyang balay tungod kay misukol kini gamit ang iyang kalibre .45 nga pusil.

Nagtagawtaw ang SOCO nga naulahi sila sa pag-abot kay giambush sila sa BHB. Usa kini ka dakung bakak kay walay pwersa sa BHB sa maong sityo niana nga panahon.

Sukwahi usab ang pamahayag sa asawa ug anak kabahin hitabo nga pagpatay kang Ignacio. Matud nila dili makasukol si Ignacio kay giposasan man kini sa mga sundalo ug pulis. Samtang sila gidala sa laing kwarto ug gitabonan sa banig sa mga sundalo ug pulis. Niini nga panahon gibutangan og kalibre .45, mga bala niini ug ubang kagamitan militar ang ilang kwarto.

Nobyembre 26 gipatay usab si Josefino ‘Lalo’ Calang sa mga berdugong tigpamatay sa PNP Caraga sa lungsod sa Sison, Surigao del Norte. Gisaka ang iyang balay sa mga membro sa PNP-Sison ug gipusil-patay ang nag-inusarang Lalo sa iyang balay. Matud sa pagarpar sa hepe sa PNP sa Sison, misukol si Lalo gamit ang iyang kalibre .38 samtang ila untang dakpon dala ang warrant of arrest kay kini membro sa Milisyang Bayan sa BHB. Ang tinuod, kini si Lalo usa lang gamay’ng negosyante lamang. Apan ang mga asset sa PNP ug 901st BDE ubos ni berdugong Banzon, nakahibalo nga may anak nga membro sa BHB sa Surigao del Norte si Lalo.

Adunay pay usa ka sibilyan sa Tandag City, Surigao del Sur ug lain pang usa ka mag-uuma sa Agusan del sur ang gipatay karong hinapos sa bulan sa Nobyembre. Padayon pang gisubay ang mga detalye sa maong mga panghitabo.

Taas na ang listahan sa padayong pagpangpatay sa mga inosenteng sibilyan nga walay ikasukol nga binuhatan ilabina sa mga pwersa sa 901st BDE ubos ni Banzon ug sa PNP sa Caraga. Kining tanan walay panagana nilang gihimo panahon sa berdugong presidente Duterte. Apan ang termino ni Duterte may kinutoban. Ang mga opisyal sa army ug pulis padayon pa pagserbisyo samtang wala pa magretiro. Moabot ang panahon nga wala na kamo masandigan nga kriminal ug berdugong Duterte. Moabot ra ang panahon nga mapahamtang kaninyo ang tukmang silot sa pagpangpatay sa mga yanong sibilyan sama sa nahitabo kang berdugong Palparan. Moabot ra ang panahon nga mapatuman ang rebolusyonaryong hustisya kaninyo. Angayan kamong manubag sa inyong mga krimen ngadto sa katawhan ug angayan nga silotan.

Ihunong ang pagpangpatay sa yanong sibilyan!

Panubagon ang mersenaryong AFP ug PNP sa ilang sala sa katawhan!