Read in: English

Kabayatan a bimtak manen ti armado a labanan iti baet ti tribu a Betwagan ken Butbut, kidkiddawen ti Cordillera People’s Democratic Front (CPDF) iti agsinnumbangir a tribu nga agkalma ken risuten ti nabayagen a kontradiksyon da babaen iti saan a nadara a wagas. Kagiddan na, umap-apela kami kadagiti mangay-ayat iti kappia nga addaan kabagian iti agsinumbangir a tribu wenno nyutral a tribu wenno organisasyon nga akseptado iti agsinnumbangir a bumallaet nga agsakusak. Dagus koma a maipatulod ti warang iti kasapaan a panawen tapno masebseban ti pudot ti agsinumbangir. Naammoan mi a pimmutok ti armado a labanan iti baet ti dua a maseknan a tribu idi Pebrero 23 ken napasarunoan daytoy manen idi Pebrero 27 ken 28. Nakalidliday a mapaspasamak dagitoy iti tengnga ti nasaknap a pandemya ti COVID-19 ken ti karkaro a kinarigat ti biag a sagsagrapen tayo. Maidurduron dagiti il-ili tayo, dagiti annak tayo ken ti masakbayan da iti saan a kinakasapulan a peggad ken sakripisyo. Ti panangitultuloy iti daytoy a gubat ket ipauneg na ti masakbayan ti intero nga umili iti ima ti narugit a gubat ti rehimen a US-Duterte babaen iti nabayagen a taktika a manggudua ken agari babaen iti panagbinnusor dagiti tribu. Dagiti laeng reaksyonaryo a dasig a mangidadanes ken mananggundaway ken dagiti imperyalista nga amo da ti agnam-ay wenno agsagrap iti bukod tayo a panaglalaban. Naragsak a buybuyaen ken agur-uray laeng dagitoy ti gundaway tapno gamruden ken agawen ti ansestral a daga ken rekurso kabayatan nga aggugubat dagiti tribu. Iti kamaudianan na, datayo met laeng ti maabak wenno mapukawan.

Saan a mailibak nga adda dakes a plano ti agdama a rehimen a US-Duterte iti panagbettak daytoy a nadara a kontradiksyon ti dua a tribu. Ken ti panangikkat kadagiti marker ti banuar ti Cordillera iti Sityo Mar-o, Barangay Bugnay, Tinglayan idi Enero 13 ket simrek iti daytoy a plano. Ti nagtultuloy a kontradiksyon dagiti tribu ti Cordillera ket nalawag nga ipakpakita na ti bogus wenno peke ken kinaawan kabaelan ti maulit-ulit a lokal a tungtongan ti kappia nga inyuna da Ret. Gen. Carlito Galvez ti OPAPP idi Disyembre 2019 ken ti naipablaak a panagbukel ti KABODONG ket nalawag a nagkurakotan ken linuluko laeng. Maisupadi iti nainkalintegan, pudno ken pangmabayagan a kappia a kalkalikaguman dagiti umili ti Cordillera, ti OPAPP babaen iti CPLA ket isuda ti puon ken mangdurdurog ti saan a pagkikinnaawatan dagiti tribu.

Palagipan mi dagiti lider ken miembro ti agsumbangir a tribu ti Betwagan ken Butbut a ti rebolusyonaryo a dalan a pinagna tayo kas nagkaykaysa nga umili ti Cordillera ket atiddogen ti dinaliasat tayo a dalan nga agturong iti nailian a wayawaya ken demokrasya. Nagkaykaysa tayo a timmakder iti dangadang kontra iti Chico Dam tapno salakniban ti ansestral a daga kontra iti komon a kabusor – ti diktadura a turay a US-Marcos. Narimbawan ti nagbabaetan dagiti tribu gapu iti panagkaykaysa tayo kas umili ti Cordillera a nabanuar a nakilaban iti daytoy a panawen. Indaton tayo ti biag tayo ken inyabante ti laban nga awan panagduadua inggana a naisardeng ti makadadael a proyekto a Chico dam. Iti agdama, taltalyawen tayo a sidadayaw ti istorikal a balligi tayo amin, maysa a balligi nga itantan-ok tayo gaputa maymaysa tayo a timmakder ken limmaban ken rumbeng nga itultuloy.

Itatta a panawen a sangsangoen tayo ti mas nakaro ken kumplikado a kasasaad no ti diktadura a turay ni Marcos, itultuloy tayo a petpetan ti napateg nga adal a nagkaykaysa a nakidangadang laban iti komon a kabusor.

Awan ti namnamaen iti agdama a malapyudal ken malakolonyal a sistema ti gimong gapu ta saan na a bigbigen ti karbengan dagiti nailian a minorya iti ansestral a daga ken ti kalintegan iti bukod a pangngeddeng, ken ditoy a nagtaud ti riri ken nagbabaetan dagiti tribu. Ti panangipagballigi ti gubat ti umili tapno maagaw ti bileg pulitika manipud kadagiti agar-ari a dasig ken panangipatakder iti sosyalista nga estado a magun-od ti aspirasyon ti intero a Pilipino. Iti laeng sidong ti sosyalismo a magun-od ti nailian a minorya ti pudno a panagbigbig iti karbengan iti bukod a pangngeddeng. Imbes a tribal war, ti panangiyabante iti gubat ti umili ti husto a solusyon a magun-od ti pudno a wayawaya, kappia ken demokrasya para iti umili ti Cordillera ken intero a pagilian. ##