Ginsaulog sang Roselyn Jean Pelle Command – New People’s Army Northern Negros Guerilla Front (RJPC-NPA) ang “NPA month” subong nga Marso pinaagi sa masunsun nga paglunsar sang aksyon militar batok sa pasistang kaaway ilabe na sa 79th Infantry Battalion sang Philippine Army kag paramilitar sini nga RPA/SCAA kag CAFGU.

Gintukod ang NPA sadtong Marso 29, 1969 kag ang bulan sang Marso gindeklarar sang rebolusyonaryo nga pumuluyo isip “NPA month” agud markahan ang bulawanon nga anibersaryo sang ila ginapalangga nga hukbo sang banwa.

Ang 79th IB dako na ang halit sa pumuluyo sang norte ka Negros bangud sang masingki nga militarisasyon sa kaumahan kag kasyudaran nga nagtuga sa pumuluyo sang dislokasyon kag pwersahan nga pagbakwit. Padayon ang ila pagpamatay, pangkastigo, pagpang-aresto, pagpanransak kag pagsaksaka sang mga kabalayan sang sibilyan kag ordinaryo nga mangunguma. Gani nagsabat ang RJPC-NPA sa panawagan sang pumuluyo nga hatagan hustisya ang mga biktima, palayason ang militar kag pauntaton ang masingki nga militarisasyon sa ila komunidad.

Yari ang pila ka detalye sa mga aksyon militar sang RJPC subong nga “NPA month:”

Sang Marso 19, madinalag-on ang operasyong haras sang isa ka team sang RJPC-NPA sa 12th IB CAFGU detatsment sa Sityo Pulupangyan, Brgy. Bug-ang, banwa sang Toboso, mga alas 11:38 sang gab-e. Nga amo permi ang ginateneran kag ginareportan sang mga lokal aset ka militar ilabe na sa parte sang Don Salvador Benedicto, San Carlos, Calatrava kag Toboso nga erya.

Sang Marso 21, sa Sityo Mayana, Brgy. Bago, Don Salvador Benedicto, mga 5:20 sang kaagahon, ginpapanaugan sang isa ka team sang RJPC-NPA sa operasyon pag-disarma ang grupo sang RPA/SCAA nga mga lokal nga aset sang AFP. Nagbato ang mga target sa disarma, rason nga napwersa nga magdepensa ang team sang RJPC. Resulta nga napatay sa amo nga operasyon sila Lucio kag Domingo Agravante nga mga myembro sang RPA/SCAA. Nakumpiska sang RJPC ang 3 ka kalibre .357, 1 ka kalibre .38, 1 ka kalibre .45 pistola kag mga bala sini dala man ang 2 ka yunit sang cellphone.

Sa amo man gihapon nga adlaw, Marso 21, mga alas 7:20 sang gab-e, ginlunsar ang operasyong haras sang isa ka team sang RJPC-NPA sa abusadong “Peace and Development Team” ukon PDT sang 79th IB sa Sityo Fuentes, Brgy. Mabini, syudad sang Escalante, nga amo ang naga-combat operations sa lain-lain nga barangay sa amo nga syudad halin pa sa nagligad nga tuig. Madasig kag hilway nga naka-atras ang mga operatiba sang RJPC-NPA.

Kabutigan ang ginahambal nanday Col. Benedict Arevalo sang 303rd Brigade, Lt. Col. Emelito Thadeus Logan sang 79th IB kag ni Maj. Win Love Bag-ao sang 33rd CMO coy nga natabo ang engkwentro kay sila ang nagresponde sa report sang pumuluyo sa presensya sang NPA. Ang kamatuoran, ang militar indi preparado kag golpe nga nagpa-“QRT” kuno sa erya agud mahinab-unan ang ila kahuy-anan.

Kabutigan ang ginahambal sang militar nga may ara nagsurender kag napilasan nga NPA sa amo nga “engkwentro.” Kabutigan ang ginahambal sang militar nga sila nakumpiska sa pila ka kahon sang mga tambal kag delata nga may balor P300,000 halin sa nasambit nga “engkwentro.” Sa panhitabo sa Sityo Fuentes, ara sa NPA ang inisyatiba kag wala kamatuoran nga napadepensiba ang hukbo sang banwa.

Gani sa mga pumuluyo sa norte ka Negros, padayon kita nga maghimakas kag indi magkahadlok sa pagtindog kag pagdepensa sa aton kinabuhi kag mga kinamatarong. Mag-andam kita sa dugang nga kabutigan, pagpang-abuso kag kalakasan sang AFP kag pasistang rehimeng US-Duterte idalum sa MO 32 o de facto Martial Law. Padayon naton pabaskugon ang aton mga rebolusyonaryong organisasyon, padayon nga ilunsar ang agraryong rebolusyon para sa matuod nga palangabuhian sang katawhan, padayon nga isulong ang armadong paghimakas kag suportahan ang Bag-ong Hangaway sang Banwa. Bukas ang RJPC-NPA sa tanan nga pumuluyo nga gusto mag-upod sa pagpasingki sang armadong paghimakas nga magadepensa sa pumuluyo kag magasabat sa panawagan para isulong ang inaway banwa pakadto sa abanteng subyugto sang stratehikong depensiba hasta sa kumpleto nga kadalag-an!