Read in: English

Kunkundenaren ti umili ti Mt. Province ti anyaman nga addang ti Kongreso a bigbigen ti diktador a ni Ferdinand Marcos kas maysa kanu a bannuar ti pagilian. Idi napalabas, nangidatag dagiti kongresista ti maysa a bill a mangdeklara ti birthday ni Marcos (September 11) kas maysa nga holiday. Awanan kais-iskan ken kontra-umili ti nasao a bill, awan serbi na nangruna ita a panawen ti nakaro a krisis pangsalun-at ken pang-ekonomiya.

Iti pakaistoryaan, ni Marcos ti nangiduron iti napaspas ken naranggas a panagserrek dagiti ganganaet ken gamrud a kumpanya ti dam, minas, ken logging iti Montanyosa ken intero a Kordilyera. Napuskol a deployment met ti militar ti kagiddan na tapno maprotektaran dagitoy a makadadael a proyekto nga agserserbi iti interes ni Marcos, dagiti kroni na, ken imperyalista a US. Nakaro a panagbaybay-a iti pagimbagan ken panaglabsing iti karbengan iti bukod a pangngeddeng ti napasaran dagiti nailian a minorya.

Ti rumbeng a kanayon a lagipen ken selebraran ket ti natured, napinget ken nadayaw a panangsalaknib ti umili iti daga a nagtaudan ken karbengan tao – karaman dagiti pang-ekonomya, pampulitika, ken pangkultura a karbengan. Dagitoy ket naiyaramid babaen iti kolektibo a panagtignay ti umili ken iti napaspas a panagdur-as dagiti rebolusyonaryo nga organisasyon ken panag-abante ti demokratiko a rebolusyon ti umili.

Rumbeng a lagipen ken aramiden a pagwadan dagiti kaappuan ken bannuar ti umili a saan nga immibbat iti kolektibo a rebbengen a takderan ti interes ti umili kontra kadagiti pasista ken diktador kas ni Marcos ken ni Duterte, ken agar-ari a dasig a mananggundaway ken manangidadanes. Ti umili ti pudno a mangbaliw iti bulok a sistema ti gimong. Ti umili ti pudno a bannuar ti sangkagimongan.

Marcos, saan a bannuar! Labanan ti diktadurya ken tiranya!
Agbiag ti lagip dagiti pudno a bannuar ti umili!
Ibagsak ti pasista a rehimeng US-Duterte!