Base sa maid-id nga pag-imbestigar sang New People’s Army (NPA) Roselyn Jean Pelle Command-Northern Negros Guerilla Front, nabuyagyag ang mga kabutigan sang AFP 303rd Brigade sa pamuno sang hari sang “fake news” nga si Col. Benedict Arevalo:

Gin-aligar sa pasistang tropa sang reaksyonaryong gobyerno nga natabo ang asud-asud nga engkwentro sa tunga sg army kg NPA sa Barangay Washington kg Barangay Langub sa Escalante City. Pero ginasulit namon nga wala sg operatiba o hangaway ang NPA-Roselyn Jean Pelle Command sa nasambit nga mga barangay. Wala man sg mga naklining nga armas kg dokumento sa NPA, ilabi na nga wala sg casualty ukon patay kay WALA MAN SANG ENKWENTRO NGA NAHITABO.

Sa maid-id na imbestigasyon, ang una nga “peke na engkwentro” sadtong Nobyembre 16, 2018, Byernes nga adlaw, sa Sityo Puting Bato, Brgy. Washington, syudad sg Escalante, sa kamatuoran, isa ka “misencounter” sa tunga sg mga tropa sg gobyerno nga nagdumog sa nasambit nga area: ang 79th IBPA, 6th PNP-SAF Battalion kg Joint Investigation Task Group.

Antes alas dyes sg aga natabo ang pagpinalupok sg 79th IBPA mga 50 metros halin sa madamo nga panimalay. Ang mga armadong tropa sg reaksyonaryong gobyerno nagpinalupok sa may kawayanan nga nagdugay sg lima ka minuto kg naghimutig nga naka-engkwentro sila sa armadong tropa sg NPA sa nasambit nga lugar.

Para matakpan ang kamatuoran nga ang ila pagpalupok sa may kawayanan nakahalit sa ila mismo nga hanay kg duha sa ila nga tropa ang napatay. Para mahinabunan ang kapalpakan sg 79th IBPA, ila nga ginkordon mismo ang area nga wala sg may makasulod nga mga opisyal sg barangay, opisyal sg syudad, katapo sg media, kg taong simbahan nga mismo malipod sa mga pumuluyo ang matuod nga nahitabo.

Nag-conduct sila sang illegal search sa kada balay kg pagpang-ransak kg pag-intirogar sa pumuluyo sa nasambit nga lugar, kag gin-deklarar nila nga kritikal ang area, para ang duha ka patay nga katapu sang ila nga tropa indi makita. Naghimutig nga katapo sa NPA ang napatay kg gindala kuno ang bangkay. Pero ang area mismo ila na gintinloan para di makit-an ang dugo sg ila mismo nga tropa na naigo.

Lipod sa ila ihibalo may mga saksi nga mangingisda nga naghalin sa baybay nga pagkatapos sg pagnilupok dali-dali nga nagpauli sa ila lugar kag sa tunga sg kampo nag-agi para makalikaw sa pag-abuso sg army. Didto man nakit-an sg mga saksi ang duha ka bangkay nga unipormado. Suno pa sa iban nga source sa sulod mismo sang hanay sg militar, positibo na-identify nga katapu sang tropa sg gobyerno ang mga patay nga sikreto gipagwa sa area.

Ginpakita sg army ang letrato nga may nakumpiska sila nga isa ka M16, ammo pouch, short nga pusil kg mga subersibo nga mga dukomento para lang may mapakita sila nga ebedensya kag patihan sila sa ila nga mga kabutigan nga ginahimo. Sa pag-imbestiga sg mga progresibo nga grupo, naggwa ang kamatuoran nga ang gina-target sg army sa Puting Bato mga survivor sa Sagay Massacre kg ang progresibo nga grupo sg mangingisda sa amo nga lugar. Ang mga “peke nga engkwentro” ginpagwa para may rason sa ila palpak nga “engkwentro,” grabe na militarisasyon kg abuso sa pumuluyo.

Samtang pagkasunod nga adlaw Nobyembre 17, 2018 isa naman ka “fake news” ang gipagwa sang 79th IB nga may ara naman sg natabo nga engkwentro tunga sg NPA kg sa ila tropa sg ila kuno nga pagconduct sg “hot pursuit operation,” sa Purok Magkaya, Barangay Langub, sakop gihapon sa amo man nga syudad. Sa amon nga pagpanalawsaw, alas syete sg aga sa sina nga adlaw sa nasambit nga lugar may ara sang pito ka tropa sang 79th IBPA nga naga-roving sa amo nga lugar. Samtang may mga kabataan nga nagahampang sang “buga,” isa ka improvised nga hampanganan nga galupok, ginkonbinar ini nga lata sang tinapa kag krikit sang lighter nga ginatughungan sg thinner para maglupok. Kag nagbalos man palupok ang mga army kay nakibot kg nataranta sa pagpalupok sa mga bata.

Pagkatapos naghimu naman sg scenario ang 79th IB PA nga may natabo na isa ka minuto nga engkwentro sa NPA kg may nakuha kuno sila nga bullet proof vest kg subersibo nga dokumento. Ang ila kapalpakan, gintabunan lang sg puro kabutigan!

Kag pagka Nobyembre 19, 2018, Lunes nga adlaw naghiwat sg isa ka symposium sa tunga sang 79th IB PA, Philippine National Police (PNP–Escalante), City Social Welfare and Development (CSWD-Escalante), LGU kg pila ka pumuloyo sa Brgy. Washington. Suno sa attendance sheet, nagtambong diri ang 80 pumuluyo kag sila Mayor Eddie Montero, Brgy. Capt. Rene Tiguelo, Lt. Col. Emelito Thaddeus Logan sang 79th IB, PNP Chief Supt. Negrado Sabando kag CSWD Head Janine Agwata.

Pagkatapos sini, si Col. Benedict Arevalo sg 303rd Brigade kag Franco Ver Lopez sg CMO Battalion nagpagwa sg mga kabutigan pina-agi sa mga statement nga may 800 ka pumuluyo ang nagperma sa petition para palayason sa Washington ang mga nagasuporta sa NPA. Sa pagkamatuod nga 80 lang ka tawo ang nagperma sa attendance sheet sa amo nga symposium. Ang 80 nagperma sa attendance, gihimo na 800 kg walay man sang aktwal na petition nga ginpapermahan.

Sa amon nga pagpanalawsaw, may interes sa duta ginakalauma sang pumuluyo ang pipila ka persona nga ara sa poder sa barangay nga naghambal nga palayason ang mga tumanduk nga ila kakontra sa duta, indi lang sa hambalanon nga palayason kay nagasuporta sa NPA. Ang army nagapasingki sa kontradiksyon sa pumuluyo para may rason ang ila presensya. Klaro kaayo sa pumuluyo ilabi na sa mga biktima nga puro kabutigan lang kg pagpakuno-kuno sang militar kg pipila nga ara karon sa manubo nga poder sa barangay pinaagi sa ila nga pagkolaborar. Nga kuntani komo mga awtoridad na sibilyan, amon sila ginahangkat na tungdan ang ila responsibilidad para maghatag sang matuod nga serbisyo kag magprotektar sa pumuluyo batok sa abuso sg militar.

Nagmadinalag-on na ang pumuluyo sa Barangay Washington sa pagpalayas sa PDT sang 303rd Brigade nga composed sa 62nd IB PA sa kumand ni Lt. Col. Castro sadtong 2017. Pero subong ang bag-o nga nagbulos nga 79th IB PA amo sa gihapon ang ila ginahimo nga pagpangharas kag paglapas sa tawhanong kinamatarong sang pumuluyo kay kuno mga supporter sang NPA. Kasubong sa Sagay 9 nga pilit nila nga papatihon ang katawhan nga ang mga NPA ang may kahimuan sa massacre. Ginahambal nila na ang rebolusyonaryong hublag indi makasarang mag-angkon sang iya kaugalingon nga teritoryo, pero ila karon ginahambal nga ang Washington isa sa mga “balwarte” sang NPA kg ang pumuluyo ila ginapasibangdan nga mga supporter sa NPA.

Pagpanghangkat sa mga ordinaryo kg manubo nga opisyal kg personel sa armadong tropa sang gobyerno nga nagsulod sa amo nga serbisyo para kuntani sa pag-alagad sa pungsod: kamo mismo nakahibalo sa kamatuoran kag dapat ibuyagyag ang grabe nga krimen sang AFP, PNP, kg paramilitar SCAA ngadto sa mangunguma kag pumuluyo subong sang Sagay Massacre, militarisasyon sa Escalante City kg iban pang abuso-militar. Ang padayon nga militarisasyon, nakaapekto sa palangabuhian sang mga mangingisda, mangunguma kag ordinaryo nga pumuluyo.

Desperado na kaayo ang gobyernong Duterte kg ang pasistang militar, bisan ano nalang ang himoon subong sa Memorandum Order 32 nga modus operandi sa padayon nga abuso. Pero indi sila makapugong sa pumuluyo nga makigbahin sa rebolusyonaryong kahublagan. Ang dunot nga rehimen ni Duterte amo ang nagtudlo para magbato sa ila ang malapad nga katawhan.

Maghimakas indi mahadlok!