Kakuyog iti masa a mangmangged, sibubukel a pigsa a supsupyaten iti Partido Komunista iti Pilipinas (PKP) ti rehimen a Marcos, ken kakumplot na a ganggannaet ken lokal a kapitalista iti panangipurwak da iti sinsilyo a ₱35 umento iti inaldaw a sweldo kadagiti mangmangged iti National Capital Region. Sigurado nga ad-adda a murkat laeng ti it-ited kadagiti dadduma pay a rehiyon.

Awan-serserbi na dagitoy a sinsilyo nga umento iti sango iti agtultuloy a panagngato iti presyo iti bagas, nateng, lames ken dadduma pay a makan, laksid pay iti langis, agas, kuryentre, danum ken dadduma pay a basaran a gagatangen ken serbisyo.

Ti ₱645 minimum a sweldo iti National Capital Region, ket nasurok kaguddua laeng iti pagkasapulan tapno disente nga agbiag ti lima-katao a pamilya. Makalkalkular nga agarup ₱1,200 ti gatad dagiti basaran a pagkasapulan da iti inaldaw-aldaw.

Saan a limos, nu di ket maiparbeng a balor iti tegged da ti ilablaban iti masa a mangmangged. Iti sango iti panagintutuleng ken panaginbubulsek iti rehimen a Marcos, rumbeng nga agtignay ti masa a mangmangged, papigsaen wenno ibangon dagiti unyon da ken dagiti timpuyog, papigsaen ti boses da, ken sangsangkamaysa nga agtignay kadagiti pabrika ken agmartsa iti kalsada.