Ang ginapatigayon nga lima ka adlaw (Hulyo 8-12) nga pagbaton sang aplikasyon para sa amnestiya sang mga sadto rebelde sang National Amnesty Commission (NAC) sa Bacolod City, Negros Occidental, isa ka mapaniplang nga iskema sang US-Marcos nga rehimen.

Luyag sini ipakita nga ang iya rehimen gusto sang kalinong paagi sa pagtanyag sang amnestiya. Apang wala ini sang kinalain sa iban pa nga nag-agi nga mga reaksyonaryo nga rehimen antes pa niya bisan pa sa panahon sang iya amay. Pareho nila ginhimo ini nga gatasan sang korapsyon ang pundo sa sini nga ahensya. Isa pa ka katuyuan sini amo ang dugmokon ang Communist Party of the Philippines (CPP), New People’s Army (NPA) kag National Democratic Front of the Philippines (NDFP) nga dako nga pamahug sa iya pagginahum. Binutig kag mapaniplang man ang pagbutang sa Revolutionary Proletarian Army-Alex Boncayao Brigade (RPA-ABB), Moro Islamic Liberation Front (MILF) kag Moro National Liberation Front (MNLF) nga mga rebelde tungod madugay na ini nga mga grupo nga nasuyop sang reaksyonaryo nga gobyerno kag nagahinan kag nakagasto na gani ini sang dako nga pundo sa ila kasugtanan upod sa reaksyonaryo nga gobyerno. Pareho sa RPA-ABB sa Negros nga pila na ka bilyon nga pundo ang nabubo para sa reintegrasyon kag mangin kabahin sang armadong pwersa sang gobyerno batuk sa rebolusyonaryo nga kahublagan.

Ini isa ka desperado nga tikang sang US-Marcos nga rehimen nga malab-ot ang iya gintalana nga dedlayn nga mawasak ang bug-os nga istruktura sang CPP-NPA-NDFP sa bug-os nga pungsod sa sini nga tuig. Gintanyag ang amnestiya sa handum nga mawasak na ang bug-os nga rebolusyonaryong kahublagan para mapalig-on ang pagbutang sa istatus sang Stable Internal Peace and Security (SIPS) sa isla agud makapokus na sa nagahana nga gyera kontra Tsina nga gina-deriheran sang iya amo nga imperyalismong US nga uhaw sa gyera.

Agud mapahambog sang 302nd kag 303rd IBde diri sa Negros nga nagahuyango na ang rebolusyonaryong kahublagan sa isla, mayoriya sa ila ginatikal nga nagsurender mga inosente nga mangunguma nga ginapasibangdan nga mga katapo kag tigsakdag sang NPA.

Imbes nga hatagan sang prayoridad ang ginaatubang nga krisis sa ekonomiya sang bug-os nga pumuluyo ilabi na sa Negros, mas ginpokusan sini ang peke nga amnestiya. Wala pa nakabangon ang pumuluyo sa grabe nga halit sang El Nino, paglupok sang Kanlaon, pagdagsa sang armyworms kag sa subong ang kalamidad nga igatuga sang nagasulod nga La Nina. Subong man, grabe ang kaimolon kag kagutom nga gintuga sang implasyon, kulang ukon wala sang trabaho kag pagpang-agaw sang duta nga nagdislokar sa palangabuhian kag puluy-an sang malapad nga mangunguma kag iban nga demokratikong sektor tungod sa neoliberal nga mga proyekto sang mga dumuluong nga korporasyon kag lokal nga mga agalon-kumprador nga nagadagsa diri subong.

Padayon ang pagpanalasa sang militarisasyon sang AFP-PNP sa kaumhan nga nagtuga sang lapnagon nga kalapasan sa tawhanon nga kinamatarung. Ang ila nga pagpamatay, pagpang-aresto, pagpamahog, pagpamomba kag iban pa, nagdugang sa pag-antus sang pumuluyo, ilabi na sa mga mangunguma.

Nagapanawagan ang NDF-Negros sa tanan nga demokratikong pwersa kag sa bilog nga pumuluyo nga Negrosanon nga hublasan ang mapaniplang nga amnestiya nga programa sang US-Marcos Jr nga rehimen. Indi dapat matiplang kag mahaylo sa kwarta kag wala sang unod nga promisa nga ginatanyag sang pasista nga AFP kag NTF-Elcac.

Tubtob nagaluntad ang isa ka malapyudal kag mala-kolonyal nga sistema sang pungsod, indi mapatuman ang matuod nga reporma sa duta kag pungsodnon nga industriyalisasyon, magapadayon kag magasulong ang armadong paghimakas para sa paghilway sa bug-os nga pumuluyo sang pungsod.###