Laing mga dagkung bakak na usab ang gitagawtaw sa usa ka Jeffrey Celis sa duso sa NTF-ELCAC sa iyang interview niadtong Nobyembre 6, 2020 sa RMN-Butuan. Matud niya nga pwersa siya sa National Organizational Command (NOC) sa Bagong Hukbong Bayan. Dugang pa ni Celis nga nakaapil siya sa duha ka bulan nga tigum sa NOC atol sa plenum sa Komisyon sa Mindanao (KOMIN) niadtong 2006 o 2007 sa Marihatag, Surigao del Sur ug New Bataan sa ComVal kung diin nagkaila sila ni Ka Oris ug kang Maria Malaya.

DAKUNG BAKAK GYUD KINI. Una sa tanan walay nahitabong plenum sa KOMIN niadtong 2006 o 2007 sa Marihatag o ComVal. Ikaduha, wala ako nailhan nga ginganlan og Eric, namati ko sa interview niya ug dili pamilyar kanako ang iyang boses. Gitan-aw nako ang iyang picture ug wala ko makaila sa iyang nawong.

Kinsa man diay ning si Jeffrey Celis? Kining si Celis lain na usab nga gigamit sa NTF-ELCAC aron dauton ang rebolusyonaryong kalihukan ug ang LEGAL nga mga progresibong organisasyon ug indibidwal/personalidad.

Subay sa mga naggawas sa balita ug pakisusi, samtang tinuod nga nahimo siyang lider sa Alyansang Makabayan (BAYAN) sa Panay niadtong 200-2004, DAKUNG BAKAK ang iyang gisulti nga nisampa siya sa NPA. Wala na usab kini mag-apil sa progresibong grupo human 2004. Ang tinuod, matud sa usa ka abogado nga kaila ni Celis, nagtago kining si Celis sa Metro Manila kay nahadlok nga gipangita sa military. 2006 hangtud 2008 anaa lang si Celis sa Manila o Tagaytay City. Niadtong 2010 niuli kini ug nagtrabaho city hall sa Iloilo City hangtud nahimong tigpamaba ni Iloilo City Mayor Jed Mabilog ug tigsabwag sa itom nga propaganda sa mga kaatbang niini sa pulitika. Niadtong 2016 nalambigit si Celis sa Dragon Drug Syndicate ug naapil uban ni Mayor Mabilog, sa listahan sa drug list ni Duterte niadtong 2016. Ang mga lider sa Dragon Drug Syndicate gipatay niadtong 2016 ug si Mayor Mabilog niikyas sa gawas sa nasud. Samtang si Celis, aron dili patyon sa militar ug tungod sa iyang panahon sa Bayan, gigamit aron pagsabwag og mga bakak alang sa pagsuporta sa mga pamakak sa NTF-ELCAC aron dili patyon sa militar.

Ang mga bakak dili gyud makapatigbabaw, kung ang maminaw nagtuki sa mga gipangyawyaw. Samot nga dili kini tuohan kung dunay mga pagtin-aw sa mga bakak nga gipakaylap.