Sining nagligad nga bulan sang Hulyo, nagapadayon ang krimen nga ginakomiter sa mga mersenaryong tropa sang 94th IB, sa tunga sang masingki nga operasyon militar sa mga nabukid nga barangay sang Buenavista, Carabalan, kag Mahalang sang Himamaylan City, Negros Occidental. Ginamaksimisa man nila ang mga traydor sa rebolusyon kag mga pekeng surrenderee para manghalit sa mga pumuluyo kag pangabuhian.

Sa Sityo Buri kag Caranawan nga sakop sang Barangay Buenavista, sa nasambit nga syudad, ginkuha sang mga surrenderee ang tuba kag saging nga pareho nga produkto sang mga mangunguma sang lugar. Suno sa nakasaksi, mga surenderee upod na si Asing Ariola ang nagkomiter sa krimen.

Naglungtad lang ang sige-sige nga pagpangawat kadungan sa pag-abot sa mga tropa militar sa nasambit nga lugar.

Samtang sa Sityo Tigbao nga sakop man gihapon sang Barangay Buenavista, ginhaboyan sang bato ang balay ni Jimboy Garson kag nagpakilala ang mga traydor sang rebolusyon nga mga NPA. Pagkatapos sini, nagbakal sila sang manok nga isa ka bilog pero nagkuha sang isa pa nga wala na ginbayaran. Nakilal-an sila upod na sanday alyas ‘Suyo/Ben’, ‘Dodong’, ‘Miguel’, kag ‘Troy/Noah’.

Sila man ang gindudahan sang mga pumuluyo sang Sityo Bugo sa amo man nga barangay ang posible nga nagkuha sa baka nga hasta subong wala pa nakita sang tag-iya nga si Ontoy Leon.

Dugang pa sini, nagtenir ang mga tropa sang 94th IB sa mga purok sang mangunguma kag Indigenous Peoples (IPs) sa mga nasambit nga barangay kag sa mga barangay sang Orong kag Oringao, Kabankalan City, Negros Occidental halin sang bulan sang Mayo tubtob subong. Nagapadayon ang ila kampanya sa pagpatawag kag pagpamahug sang mga ginadudahan nga ‘nagasuporta sang NPA’ kag pagpangred-tag sa mga sibilyan sa lugar.

Kalinya ini nga mga operasyon kag krimen sang kampanya sang Armed Forces of the Philippines (AFP) sa ila sala nga deklarasyon nga wala na sang NPA ang lugar kag ‘dismantled’ na ang larangan gerilya sa South Central Negros.
Kasugpon man ini sa pagpasiguro sang mga matiplangon nga ‘proyekto para sa kalambuan’ sa lugar, nga sa matuod nagaduso lang sa interes sang mga komprador-agalon mayduta nga monopolyohon ang kadutaan sa yutang kabilin sang IPs kag pangabuhian sang mangunguma.

Gani, pamatuod lang ang mga ulihi nga operasyon sang RNC-NPA kontra sa mga aset militar kag mapangwasak nga proyekto sang kwari nga padayon nga manukot ang larangan gerilya sa mga may utang nga dugo kag iban pa nga krimen kontra sa pumuluyo kag rebolusyon. Padayon man nga magabwelo ang Pulang Hukbo sa iya komprehensibong hilikuton sa balayon sang demokratikong rebolusyon sang banwa nga may sosyalistang perspektiba, tubtob sa kadalag-an.###