Gipatuman sa Roselyn Jean Pelle Command-New People’s Army (RJPC-NPA) ang silot kamatayon nga gimando sa rebolusyonaryong korte sa pumuluyo batok kang Rickne Daipal, sa mga alas 5:50 sa buntag niadtong Martes, Abril 15, sa Sityo Bairan, General Luna, Toboso, Negros Occidental.
.
Nalambigit si Daipal sa dili momenos lima ka kaso sa pagpatay sulod sa pipila ka katuigan. Kini naglakip sa usa ka menor de edad nga taga-Sityo Burgos sa susamang barangay nga iyang nakabingkil sa dulang basketball ug gipatay pinaagi sa pagbuno.

Ang laing mga biktima mao sila si Ernesto Laurente nga pumuluyo sa Sityo Bairan nga iyang giatangan ug gidakdakan sa bato sa taphaw kaayo nga hinungdan. Si Jimmy Manus nga taga Sitio Gabon-gabon nga iyang gibuno sa pagduda nga ang biktima usa sa mitulis sa iyang kaila bisan wala kini igong ebidensya. Ang giilang Jimmy gipusil ni Daipal human kini magmaoy. May gipatay usab siya nga taga Sityo Punta, Barangay Salamanca, Toboso.

Gawas pa niini, nahimo siyang pintas nga goon ug tigbantay sa yuta sa pamilyang Tan diin iyang gipahog, gitayaan sa pusil, gipalukpan ang mga tawo nga mangahoy ug manlawig sa ilang mga sapat. Gihalitan usab niya ang ilang mga tanom pinaagi sa pagpakaon niini sa sapat.

Isip aset sa intelligence sa militar, aktibo siya sa pagpanilag ug pagpahog sa lihok sa pumuluyo sa lugar nga iyang gidudahan nga mga taga suporta ug myembro sa rebolusyonaryong kalihukan.

Bisan pa man sa mga mangilngig nga krimen nga iyang nahimo, gipasagdan ug gi-tolerar siya sa kapulisan ug sa reaksyunaryong gobyerno.

Nahitabo ang pagsilot kang Daipal wala pay isa ka bulan human mahitabo ang malampuson nga kontra-opensiba sa RJPC-NPA sa Sityo Bairan batok sa nangatake nga pwersa sa #DiMasaligan79IB niadtong Marso 18 diin napatay ang duha ka sundalo ug nasamdan ang lain pang tulo.

Dobleng tamparos kini sa #DiMasaligan79IB ug nagpatingkad sa kapalpak sa iyang kampanya sa pagsumpo ug paglagas sa rebolusyonaryong kalihukan. Nagpakita kini sa lawom ug walay pagkahubas nga suporta sa pumuluyo sa NPA.

Determinado ang RJPC-NPA nga depensahan ang pumuluyo batok sa mga malain ug naghalit kanila nga mga elemento ug gaway sa militar.