Hul-os nga iginkakangalas ngan ginkukundenar han Pambansang Katipunan ng Magbubukid-Eastern Visayas, rebolusyunaryo nga organisasyon han mga parag-uma ha rehiyon, an madarahug nga pagpatay han militar ha usa nga batan-on nga parag-uma ha Borongan City, Eastern Samar, ngan dagmit nga pagtatahub ha insidente han 802nd Infantry Brigade ngan 8th Infantry Division.

Namatay ha panmusil an 16-anyos nga batan-on nga hi Jason Grafil Padullo han Barangay Benowangan ha nasering nga syudad hadton Hunyo 15. Sigon ha mga nasulod pa nga mga report, nakadto ha uma ha gawas han sityo an biktima kaupod an usa pa nga batan-on han pabuthan hira han mga nag-ooperasyon nga sundalo. Namatay hi Jason ha mga igo han bala samtang maswerte nga nakatalwas an iya upod.

Agud tahuban an ira krimen, waray bisan ano nga ginhihimo nga pagkumpirma ha panhitabo an 802nd Infantry Brigade ngan 8th Infantry Division diin nakapailarum an 63rd IB. Lugod, iginrarakudako pa nira nga may napatay hira nga kunuhay Pula nga mangaraway samtang nagdidiwara ngan baga hin waray baratunon ha nakapiyong nga pangistraping han ira mga tropa ha batan-on nga sibilyan.

Dugang la nga ginpapamatud-an hini nga trahedya an maiha na nga kabatasanan han pasista nga 8th ID ha Eastern Visayas nga pagtarget ha mga sibilyan nga parag-uma ha kondukta han mga operasyon hini ha kabaryuhan. Antes kumadto ha uma hira Jason, nagsarit anay hira ha mga tropa nga RCSP nga nakakampo ha ha ira baryo. Ha luyo hini, ginpanmusil pa gihap hira.

Ha naglabay nga 12 kabulan, diri mamenos ha pito nga parag-uma an ginpatay han mga sundalo. Ngatanan hira ginpagawas nga “inato” o namatay ha “engkwentro.” Kundi ha kamatuoran, mga ordinaryo hira nga parag-uma nga ginpatay han pasista nga rehimen.

Atubangan hini nga pagtamas-tamas ha mga katungod han mga sibilyan ngan ha makatawo nga balaudnon han gerra, maisugon nga nagyayakan yana ha social media an mga kaurupdan ni Jason ngan mga molupyo han Borongan agud igpahimuwa an basura nga iginpapasarang han 8th ID ha pag-atentar nga itago an ira krimen. Kaangayan la an ira kangalas ngan makatadungan an ira pagdemanda han hustisya. Komo igkasi nira nga tinalumpigos ngan gintitiyupi, kinahanglan makig-usa kita ha ira ngan paaningalon an ira panawagan ha bug-os nga nasud ngan kalibutan, nga papagbatunon an peste nga militar nga nagpatay kan Jason ngan nagsasabrag hin ngirhat ha mga komunidad han parag-uma.

Bisan ano nga pagbinuwa han 8th ID, diri hini matatago nga sobra hira nga ginkakangalsan han mga parag-uma. Tiunan-o nga diri, labina nga kun nag-ooperasyon hira diri talwas nga makapanrabaho ha uma an mga parag-uma? Labina nga kun nakada ha baryo, samwak an huygo, irinom, kasamok ngan pangabuso ha kababayin-an? Kun aada hira ginraransak an mga balay, ginhahalikwat an mga gamit, ngan gin-iihaw an mga inataman nga hayop? Kun aada hira “ginpapasurender” an mga inosente, ginkakastigo ngan ginpapatay an hin-o man nga diri nasunod ha ira?

Ura-ura kahambog han 8th ID nga pagawason nga “nananamok” an Bagong Hukbong Bayan ngan ini an hinungdan han kawaray kamurayawan ha kabaryuhan, nga kada nakakaupod han masa an BHB, kampante ini, maaram nga diri gud ini pasusul-an, ngan ipapakig-away an ira interes para ha pankatilingban nga hustisya kinabuhi man an ighalad.

An natikapintas nga terorismo han estado ha kabaryuhan dugang nga nagduduon ha panginahanglan nga magkaurusa ha gilayon an masa nga parag-uma ngan pumartisipar ha kinabuhi-ngan-kamatayon nga pakigbisog para ha ira mga katungod ngan panginabuhi. Diri bisan san-o malalauman an estado han mga naghahadi nga klase nga pagpapatakas la an interes ngan ginpapanalipdan han militar. Aada ha aton mga kamot an tinuod nga pagbabag-o. Kaupod an BHB ngan hiluag nga masa nga Pilipino, ha giya han Partido, segurado an kadaugan.