Pareho sa ginalauman sa isa ka ido-ido, pasista, korap kag paantus nga rehimen, ang tanan nga gin-ngasal ni Marcos Jr sa iya ikatatlo nga State of the Nation Address (SONA) nagalutaw sa hangin kag wala nagasanto sa reyalidad para masabat ang mga demanda kag hinaing sang malapad nga pumuluyong Pilipino.

Ginpasadahan lang ni Marcos Jr ang problema sang gutom kag kapigaduhon sang pumuluyo apang wala man sang gintanyag nga kongkreto nga solusyon kundi puro mga indi signipikante nga ayuda nga indi man makatalaptap sa bug-os nga pigado sa pungsod. Nagakinalipay ang iya alipures nga ara sa burukrasya nga may magan-itan naman para sa ila korapsyon.

Mas ginpasundayag kag gintikal ni Marcos Jr amo ang madamo nga mga imprastruktura nga gingastuhan kag gingahinan sang binilyon nga pondo, mga pangapital sa pungsod sang mga dumuluong monopolyo kapitalista kag importasyon sang mga sandigan nga mga produkto, nga ang makabenepisyo amo lamang ang iya kasahi nga mga agalon mayduta-kumprador kag burukrata kapitalista.

Ang iya palupad nga mga istadistika nga ginpangyawyaw pareho sa pagbutyog sang ekonomiya, bahin sa pag-uswag sang agrikultura kag dugang nga trabaho, nga kuno kadalag-an sang iya pagdumalahan kabaliskaran sa tuman nga kalalaon sang krisis pang-ekonomiya nga gina-atubang sang pungsod.

Wala gid nasambit sa SONA ni Marcos Jr ang mga ginademanda sang pumuluyo kaangay sang matuod nga reporma sa duta, pagpasaka sang sweldo sang mga mamumugon, pagpanubo sang presyo sang mga balaklon, seguridad sa pagkaon, sustenable nga suportang agrikultural sang mga mangunguma, problema sang tradisyunal nga dyip tungod sa modernisasyon kag iban pa. Wala man ginhatagan sang igtalupangod ni Marcos Jr ang akawntabilidad sang iya mga mersenaryo kag berdugo nga mga pwersa sang Armed Forces of the Philippines (AFP) kag Philippine National Police (PNP) sa ila madata nga pagpanglapas sa tawhanon nga kinamatarung nga ila ginahimo batok sa pumuluyo sa kabukiran kag kasyudaran.

Mas ginpadaku pa ni Marcos Jr ang isyu sang POGO nga kasugpon sa iya katuyuan nga maglatum ang kontra-Tsina nga sentimyento sa pumuluyo. Naga-asta man siya nga nasyunalista paagi sa paghambal nga “aton ang West Philippine Sea,” apang ang matuod, iya ginapakita ang lubos nga pagkapapet sa US sa pagpasugot nga himuon nga base militar sini ang Pilipinas nga magadalahig sa gyera sa tunga sang duha ka pinakadalagko nga imperyalista sa kalibutan, ang US kag Tsina.

Kasubong man, wala sa adyenda sa iya pamulong-pulong ang bahin sa iya gintanyag nga negosasyon sa kalinong sa National Democratic Front of the Philippines (NDF) paagi sa ginpagwa nga joint communique sadtong Nobyembre 23, 2023 sa tunga sang NDF kag Gobyerno sa Republika sang Pilipinas (GRP). Tubtob subong wala ini masugdan. Mas ginpondohan kag gintawtaw niya ang pagtanyag sang amnestiya sa mga sadto rebelde paagi sa National Amnesty Commission (NAC). Imbes nga kumprehensibo nga sabton ang ugat sang problema sang insurhensiya nga yara sa ginahapag sang NDF nga Comprehensive Agreement on Social and Economic Reforms (CASER), patraidor nga nagtanyag ini sang amnestiya. Nagapakita lang nga pakuno-kuno kag indi seryoso si Marcos Jr nga mag-angkon sang makatarungan kag matuod nga kalinong sa Pilipinas.

Sa sini nga tion, paabuton ang mas malala nga kahimtangan pang-ekonomiya kag pulitika sa paghari ni Marcos Jr tungod sa iya kontra-pumuluyo nga patakaran neoliberal nga gintum-ukan sa iya SONA. Nagakaangay lang nga magpadayon nga hugpungon ang kusog sang bilog nga pumuluyo, ilabi na ang mga Negrosanon, agud pangapinan kag itib-ong ang ila kinamatarung sa kabuhi kag palangabuhian.

Ginapanawagan sang NDF-Negros ang tanan nga mga demokratiko nga sektor kag ang bilog nga pumuluyong Negrosanon nga ululupod nga pukawon, organisahon kag pahulagon ang malapad nga ginapigos kag ginahimuslan nga pumuluyo sa kaumhan kag kasyudaran agud batuan ang papet, pasista kag paantus nga rehimen Marcos Jr. Makatarungan ang paglunsar sang demokratikong rebolusyon sang banwa paagi sa pangmalawigon inaway banwa para maangkon ang matuod nga kahilwayan kag demokrasya.###