Salubungin natin sa darating na Disyembre 26 nang buong kapasyahan at lakas ang ika-57 anibersaryo ng pagkatatag ng Partido Komunista ng Pilipinas (PKP). Sa mga susunod na buwan, ilunsad natin ang masigla at malawak na kampanya para ipagdiwang ang natamong mga tagumpay ng uring manggagawa at sambayanang Pilipino sa deka-dekadang pagsusulong ng mga rebolusyonaryong pakikibaka sa gabay ng Partido.

Ibinibigay natin ang pinakamataas na pagpupugay at pagsaludo sa mga martir sa pagsusulong ng rebolusyon, ang mga kadre at kasapi ng PKP, mga matatapang na kumander at mandirigma ng Bagong Hukbong Bayan, mga lider at kasapi ng mga rebolusyonaryong organisasyong masa at ang masa na nag-alay ng kanilang buhay upang sumulong ang digmang bayan at makamit ang kasalukuyang antas na narating nito.

Sa harap ng napakatinding kahirapan at kaapihang danas ng malawak na sambayanang Pilipino sa ilalim ng pahirap at pasistang rehimeng US-Marcos, ipinapanawagan natin ang buong sigasig na pagpapaigting ng digmang bayan upang umambag sa pagpapatalsik sa pangkating Marcos Jr at Duterte na hari at reyna ng korupsyon gayundin ang kumprehensibong pagsusulong ng demokratikong rebolusyong bayan sa mas mataas na antas hanggang sa makamit ang ganap nitong tagumpay sa di malayong hinaharap at maitatag ang sosyalismo sa ating bansa.

Sa kasalukuyan, tumitindi ang paksyon ng pangkating Marcos Jr at Duterte habang ang ating ekonomya ay nasasadlak. Mula sa sunod-sunod na pagsabog ng mga iskandalo bunsod ng maanomalyang flood control at infrastructure projects, lalo ring pinasisidhi ng hidwaan ng mga naghaharing uri ang patuloy na pandarambong sa kaban ng bayan ng mga burukrata kapitalista. Dudulo ang hidwaan ng hari at reyna ng korupsyon sa kung sino sa kanila ang mas papet ng imperyalismong US.

Sa National Capital Region, mayroong aabot sa 1,057 flood control projects na may pondong ₱52.66 bilyon ngunit taon-taon ang paglala ng nararanasang epekto ng bagyo ng mga maralitang komunidad at bulnerableng sektor. Mas tumitindi ang pagbaha at mabilis na pag-apaw ng mga ilog na nagbunga ng pagkamatay ng marami mamamayan at pagkasira ng kanilang kabuhayan, habang nalulunod naman sa pera ang mga nasa pamahalaan. Kung gaano kabilis tumaas ang baha, ay siya namang bagal umaksyon ang pamahalaan.

Bukod pa sa mga substandard at ghost flood control projects, lumalala ang pagbaha dahil sa pagpayag ng gobyerno sa malawakang pagsira sa kalikasan. Negosyo rin kung turing ng rehimeng US-Marcos ang kalikasan sa halip na pangalagaan at linangin ito.

Napatunayan na sa taon-taon na pagpasa ng badyet sa Kongreso at Senado, nakikita natin kung ano ang prayoridad ng estado na badyet sa panunupil, bayad-utang, pagnanakaw, at pagpataw ng dagdag na buwis sa mamamayan para ipagpatuloy ang panghuhuthot, paglulustay sa luho at pampulitikang ambisyon ng pangkating Marcos Jr at Duterte.

Sa gitna ng malawak na krisis panlipunan, nasa pusisyon ang Partido na pamunuan ang pagsigla ng mga pakikibakang masa, at palawakin at palakasin ang rebolusyonaryong kilusang masa kapwa sa kalunsuran at kanayunan, kaakibat ng pangkalahatang pagpapabwelo sa demokratikong rebolusyong bayan.

Ubos-kaya nating palawakin at palakasin ang Partido at ang organisadong hanay ng masa. Iwasto ang mga pagkakamali at pangibabawan ang lahat ng mga kahinaan at pag-aalangan. Hugutin at buklurin ang galit sa dibdib ng masa, at pamunuan ang kanilang mga paglaban laluna sa harap ng malubhang pang-aapi at pagsasamantala. Para sa bagong mga tungkulin, kailangan natin ng bagong mga pwersa na puno ng sigasig, sigla at militansya. Palitan natin ang mga nawala o nanamlay.

Lubos na nakikiisa ang National Democratic Front-Metro Manila sa paggunita ng ika-57 na anibersaryo ng Partido Komunista ng Pilipinas! Sa kabila ng matinding kahirapan, handa ang mamamayan ng Metro Manila na lumahok sa demokratikong rebolusyong bayan, sumuporta sa armadong pakikibaka, magpaunlad ng rebolusyonaryong praktika at teorya, at umambag sa pagsibol ng demokratikong republikang bayan tungo sa pagkamit ng sosyalismo at hanggang sa tuluyang pagpawi sa uri. Hinihikayat ng NDF-MM ang mga manggagawa, kabataan-estudyante, maralitang lungsod sa metro manila na tumungo sa kanayunan, lumahok sa armadong pakikibaka, at sumapi sa Bagong Hukbong Bayan!

Nananawagan din ang National Democratic Front-Metro Manila sa lahat ng rebolusyonaryong pwersa, lahat ng api at pinagsasamantalahan na lumahok sa pagdiriwang para ibayong pagtibayin ang determinasyon na isulong nang buong sigasig ang demokratikong rebolusyong bayan.

Taluntunin natin ang nagdaang 57 taong rebolusyonaryong pakikibaka, mula sa pag-usbong hanggang sa pagsulong, sa mga pag-atras at muling pag-abante, at sa mga tagumpay, kabiguan at mas malalaking tagumpay. Bakasin natin ang kasaysayan ng rebolusyonaryong pakikibaka para sa pambansa at panlipunang paglaya. Humalaw tayo ng mga aral at inspirasyon sa mga sakripisyo ng mga martir at bayani at mga naunang salinlahi ng mga proletaryong rebolusyonaryo.

Itanghal natin ang mga tagumpay sa nagdaang 57 taon ng rebolusyonaryong pakikibaka. Malalaking tagumpay ang nakamit ng sambayanang Pilipino sa pagsusulong ng armado at iba’t ibang anyo ng pakikibaka!

Mabuhay ang Partido Komunista ng Pilipinas!

Mabuhay ang Bagong Hukbong Bayan!

Mabuhay ang Pambansa Nagkakaisang Prente!