Ginpatuman sang isa ka yunit sang Leonardo Panaligan Command-New People’s Army (LPC-NPA) ang pagsilot kay Raymund Francisco Nuevo @Pato, 39 anyos, masupog nga intel sang Armed Forces of the Philippines (AFP), niadtong Miyerkules, Pebrero 11, alas 2:00 sang hapon sa Sityo Natuling, Barangay Budlasan, Canlaon City, Negros Oriental.

Anay katapo man siya sang CAFGU sa Barangay Montilla, Moises Padilla, Negros Occidental.

Si Nuevo imbolbado sa brutal nga pagpatay kay Rene “Toto” Quirante sa Sityo Amumuyong, Barangay Trinidad, Guihulngan City, Negros Oriental sadtong Oktubre 1, 2010. Si Quirante isa sa mga lideres sang Kapunungan sang Gagmay’ng Mag-uuma sa Oriental Negros (KAUGMAON-Guihulngan Chapter).

Tuig 2011, isa si Nuevo sa pito ka katapo sang CAFGU nga naghimulos sa isa ka 17 anyos nga dalagita kag estudyante sa Purok Balas, Barangay Montilla proper, Moises Padilla. Ini ang rason sa paggwa ni Nuevo sa CAFGU.

Imbolbado man siya sa pagpangkastigo kag pagpamahug sa mga sibilyan, nagapahubog kag nagamaoy tubtob sa pagpalupok sang armas nga nagahatag sang kakugmat sa mga residente.

Bangud sang mga krimen nga ginpanghimo ni Nuevo, tuig 2012 ginpamatbatan siya sang silot nga kamatayon sang rebolusyonaryong korte sang pumuluyo matapos ang pagbista kaangot sa ginpasaka nga kaso sa iya sang mga biktima.

Sang tuig 2013, boluntaryo nga nagsumiter si Raymund sang iya kaugalingon sa rebolusyonaryong kahublagan nga nag-ako sang iya mga krimen upod sa apelasyon sang iya pamilya. Rason nga “gin-freeze” ang iya “standing order” nga ginmando sang korte sang pumuluyo sa tuyo nga magbag-o sa iya malain kag kontra-pumuluyo nga mga gawi.

Imbes nga magbag-o, sa baylo mas nagbaris pa si Nuevo sa paghimo liwat sang mga kalakasan batok sa rebolusyonaryong kahublagan kag pumuluyo kaangay sang mga masunod:

1. Sekreto nga nagbalik sa militar si Nuevo kag nangin aktibo nga nagapaniktik sa hulag sang NPA sa lugar kag direkta nga nagareport sa CAFGU detachment sa Barangay Alingasaw, Moises Padilla.

2. Nagapagamit man si Nuevo sa mga bayaran nga grupo, kontra-sosyal kag hitman nga may angot sa militar sa pagpamatay sang mga sibilyan nga ginadudahan nga mga suporter sang NPA.

3. Kabahin si Nuevo sa paghold-up kag pagpatay kay Nonoy Superalis sang Purok Lubi, Barangay Alingasaw, sa amo man nga banwa. Si Superalis gintulis-patay sadtong Pebrero 17, 2023 sa Crossing Taborda, La Castellana, Negros Occidental. Nakuha kay Superalis ang masobra ₱500,000 nga kantidad sang kwarta.

4. Imbolbado man si Nuevo sa pagpatay kay Joseph Miguel sang Sityo Balunggay, Barangay Alingasaw. Natabo ang pagpatay kay Miguel sadtong Disyembre 17, 2025 sa Purok Sab-a sang nasambit nga barangay.

Ang pagpatuman sang silot nga kamatayon kay Nuevo amo ang pagsabat sang NPA sa ginahandum nga hustisya sang pamilya sang mga biktima. Magserbe man ini nga mabaskog nga paandam sa mga indibidwal nga may kaangay nga gawi ni Nuevo.

Ang LPC-NPA padayon nga nagapanawagan sa tanan nga may gina-atubang nga krimen sa rebolusyon kag pumuluyo. Sekreto magsumiter sang inyo kaugalingon kag sinsero nga atubangon ang inyo mga kaso. Ang NPA indi gid magduha-duha sa paglagas sa inyo sa paghatag sang hustisya sa inyo mga nabiktima.