Gikondenar sa Leonardo Panaligan Command -New People’s Army (LPC-NPA) ang pagpanghimakak ni 3ID Spokesperson Col. Erwin Lamzon nga wala silay gisaka nga panimalay ug may permiso sila sa barangay kapitan. Ang tinuod, gisaka sa mga pwersa sa 62nd IB ang isa ka balay niadtong Hulyo 27, sa Sityo Sampungan, Barangay Macagahay, Moises Padilla, Negros Occidental.

Didto sila nagtiner og usa ka adlaw ug usa ka gabie. Naghatag kini og perwisyo sa lumulupyo sa lugar tungod ang militar mismo ang nagpasiugda sa sugal ug nagmugna kini og kasaba.

Imbes sila ang manguna sa pagpasunod og maayong pamatasan hilabina sa kabatan-onan, sila na hinuon ang naghatag og kagubot sa ilang mga lugar nga mapundohan.

Samtang niadtong Agosto 2, miabot ang tropa militar sa Sityo Tagbak, Barangay Trinidad, Guihulngan City, Negros Oriental, ug may balay kini nga gisaka. Pagka-pasado alas 9:00 sa gabii, gisugo pa sa mga sundalo ang tagbalay nga magpadul-ong sila sa kasikbit nga balay apan nagbalibad kini tungod kay dis-oras na ss gabii. Giingnan sila sa tagbalay nga inigka-ugma na lang kay idul-ong sila sa balay nga gusto nilang adtoan.

Gikan sa Marso hangtod Hunyo niining tuiga, nakatala ang LPC-NPA og mga bayolasyon sa nasambit nga militar nga ang mga biktima nikabat og 10 ka inosenteng sibilyan sa pagpang-ipit, pagpangransak, pagpasaka og mga hinimo-himong kaso ug pugos nga pagpatudlo kon asa ang presensya SA NPA.

Sukwahi kini sa giingon ni Lamzon nga may permiso sila sa mga barangay kapitan sa mga lugar ug panimalay nga ilang gipangsaka.

Dapat nga respetuhon sa 62nd IB ang katungod sa katawhan nga mabuhi nga malinawon ug dili mabiktima sa ilang pagpang-abuso.

Dapat kanunay nga hunahunaon sa militar ang kaayuhan sa katawhan nga maoy nagsweldo ug nagpakaon sa ilaha pinaagi sa buhis sa katawhan.

Kon anaa ang pagpanglapas sa AFP sa tawhanong katungod sa katawhan hilabina sa mga mangunguma, sila na mismo ang nagtudlo sa katawhan nga makigbisog ug depensahan ang ilang katungod pinaagi sa pagsalmot sa armadong pakigbisog.