‎Sadtong Pebrero 25, ginpasidunggan sang mga kadre sang Partido kag Pulang hangaway ang rebolusyonaryong kasaysayan ni Reynalde ‘Ka Amek’ Erecre nga namartir sa Barangay Bi-ao, Binalbagan, Negros Occidental sadtong Enero 30, 2026.
‎
‎Paagi sa isa ka programa, gindumdom sa mga kaupod ang nangin kabuhi ni Ka Amek bilang isa man ka kadre sang Partido kag Pulang kumander sa isla sang Negros. Sa iya pagkamuklat sa kahimtangan bilang isang estudyante kag sa indi madugay isa man ka mamumugon, gin-amot ni Ka Amek ang iya bilog kabuhi para sa rebolusyon kag sa sahing ginpigos kag ginhimuslan, tubtob sa iya katapusan nga ginhawa.

‎
‎Gindumdom sa mga kaupod si Ka Amek bilang isang huwaran nga kadre, maisog nga kumander, kag modelo sa disiplina kag pag-atubang sa sakripisyo sa banas sa rebolusyon. Magluwas sini, gindumdoman man si Ka Amek bilang palakadlaw kag lapit sa masa kag kaupod.

Partikular sa hanay sang masa sa Southwest Negros kon sa diin nakahulag man si Ka Amek, nasubo sila sa iya kamatayon pero nahangkat man sila sa iya pagkamartir.
‎
‎Sa iya tatlo ka dekada nga pagrebolusyon, damo na napatuhaw si Ka Amek nga mga pamatan-ong kadre kag kumander lakip na sa hanay sang mga Pulang hangaway sa ASJC-NPA. Gani, upod sa pagdumdom kag kasubo sa pagkamartir sa anay Sekretaryo sang Partido sa rehiyon, ara ang kadeterminado sa sunod nga henerasyon sang mga rebolusyonaryo nga ipadayon ang banas ni Ka Amek.
‎
‎Nagasumpa ang mga kaupod nga hatagan sang hustisya ang iya pag-ula sang dugo, kag iabante ang tikang para dugang nga mapabaskog ang demokratikong rebolusyon sang banwa hasta sa matuod nga kadalag-an, kag matukod ang katilingban nga may pangmalawigon nga kalinong kag demokrasya.