Pulang Pagsaludo, Ka Leo de Guerra, Martir ug Rebolusyonaryong Propagandista

Ang National Democratic Front of the Philippines- North Eastern Mindanao Region (NDFP-NEMR) kauban ang Partido Komunista ng Pilipinas (PKP), Bagong Hukbong Bayan (BHB) ug rebolusyonaryong pwersa sa rehiyon nagpadangat sa usa ka pulang pagsaludo ug pasidungog ngadto kang Rino “Ka Leo de Guerra” Colaste. Usa ka martir ug rebolusyonaryong propagandista sa katawhang Pilipino.

Naila sa mga rebolusyonaryong pangalang Oto, Joy, Mote, Dee, Bryan ug ang iladong Ka Leo de Guerra, tigpamaba sa NPA-Surigao del Norte si Rino Colaste, 55 anyos menyo ug adunay tulo ka anak. Nakahuman sa kolehiyo sa kursong Electrical Engineering. Sa kalisod sa ilang pamilya wala siya hingpit nga nahimong Engineer. Naningpalad siya sa lain-laing trabaho didto sa Manila aron makatabang sa iyang pamilya.

Dili ikalimod ang iyang pagkaprogresibo dihang aktibo siyang nitubag sa panawagan alang sa pag-organisa sa katawhang kabus ug nilupigan aron batukan ang mapahimuslanon ug madaugdaugong sistemang gipadagan sa mga nagharing hut-ong. Nahigmata siya nga pinaagi lamang sa pagpangulo sa proletaryado sa duha ka yugtong rebolusyong Pilipino maangkon ang kadaugan ug matukod ang katilingbang sosyalista sa Pilipinas.

Isa siya sa mga ilado ug maayong mga organisador ug lider sa mga mamumuo diha sa mga dagkong langyaw’ng minahan sa Surigao del Norte (isa niini ang Placer Mining nga kanhing Manila Mining). Nangulo siya diha sa mga unyong mamumuo sa pagpukaw, pag-organisa ug pagpalihok kanila alang sa pagpataas sa ilang suholan, benipisyo, kasegurohan sa trabaho, maayong kahimtang sa panarbahuan ug uban pa. Ubay-ubay nga mga ekonomikanhong demanda sa mga mamumuo sa minahan ang pugos nga natubag sa mga kapitalista tungod sa hiniusang kalihukan sa mga mamumuo.

Sa kataas nga militansyang naabot sa mga trabahante sa minahan diha sa pakigbisog sa mga kapitalista, usa si Ka Leo de Guerra nga giinitan sa reaksyunaryong estado. Nasinati niya ang pagpamig-ot ug pagpanghulga sa mga ahente sa estado apan bisan paman niini wala niya gisurender ang iyang baruganan. Maong hugot nga nagdesisyon siyang mosampa sa NPA kaniadtong 2011 sa edad nga 44 anyos.

Bisan paman nga hingkod na sa pangidaron si Ka Leo de Guerra dihang nisalmot siya sa armadong pakigbisog, dili kini babag sa iyang pagpatuman sa mga tahas sulod sa hukbo. Usa siya sa mga maayong propagandista sa mga kauban ug masa, han-ay mohatag og mga pagtuon, mokritik sa mga pagkulang, mohatag og mga giya ug aktibo sa mga tahas. Sa mga nakatrabaho niya naila usab siyang emosyonal, mapahiubsanon ug mahigugmaong amahan.

Isip usa ka tigpamaba sa NPA-Surigao del Norte, tatak niya ang pagkakalmadong moistorya diha sa mga sibyaan sa radyo ug sa mga pangpublikong programa sa Bagong Hukbong Bayan. Bisan paman sa init nga lantugiay sa kaaway’ng tigpamaba ug kang Ka Leo de Guerra, kalmado niya kining ginatubag, ang matag isyo ug mga itom nga propagandang ginabato sa kaaway batok rebolusyonaryong kalihukan. Kalmado ug tin-aw niyang ginaisplikar sa publiko ang tumong sa Demokratikong Rebolusyon sa Katawhan.

Nakutloan sa iyang bilihong kinabuhi si Ka Leo de Guerra kaniadtong July 31, 2022 sa may alas 9:00 sa gabie sa usa ka pagpamomba sa kahanginan sa Philippine Airforce sa ilang yunit didto sa bukirong dapit sa Lungsod sa Santiago, Agusan Del norte. Gidala ug gitagoan sa kaaway ang iyang patay’ng lawas. Usa kini sa mga hinungdan nganong dugay nakapagawas og sulat pamahayag kalabot sa iyang kamatayon tungod sa padayong pagkompirma pa niini, dugangan pa sa mga pokus nga operisyong militar sa kaaway.

Nawad-an man ang katawhan og usa sa mga maayong rebolusyonaryong propagandista ug lider Komunista apan alang sa iyang pamilya, higala, mga kauban, mga masa ug sa publiko nga nakadungog ug nakainterbyu sa iya, dili mahikalimtan ang iyang mga tam-is nga pahiyom ug mga bulawanong tudlo.

Magpabiling buhi ang iyang diwa ngadto sa katawhan ug hangtod sa mosunod pa nga mga henerasyon.

Martir sa rebolusyon, bantayog nga di matarog!

Pulang Pagsaludo, Ka Leo de Guerra, Martir ug Rebolusyonaryong Propagandista