Bisan pa man sa sunod-sunod nga operasyon sang 94th IB sa erya sang South Central Negros, madinalag-on nga ginhiwat sang Romeo Nanta Command-NPA ang paghatag sang parangal para sa duha ka namartir nga mga kaupod nga sanday Reynalde “Ka Amek” Erecre kag “Ka Joem” Golez, nga napatay sadtong Enero 30, 2026 sa Sityo Apitong, Barangay Bi-ao, Binalbagan, Negros Occidental.

Ginsugdan ang programa sa pagkanta sang ‘International’ kag matapos ini, ginbalikan sang mga kaupod ang tagsa-tagsa nga kasaysayan sang mga namartir ilabina na kay Ka Amek, ang sekretaryo sang Partido Komunista sa rehiyon. Ginlawag ang iya mga nangin amot sa pagpasulong sa armadong paghimakas indi lang sa Negros kundi lakip na sa mga katambi sini nga rehiyon kon sa diin siya naghulag antes nadeploy sa Negros.

Indi manegar nga bisan may kasubo, nagapangibabaw gihapon ang rebolusyonaryong kaisog sa mga nabilin nga mga Pulang hangaway kag mga kadre sang Partido nga ipadayon ang nasugdan nila Ka Amek kag Ka Joem. Gani, mas damo pa ang magausoy sa banas sa rebolusyon sa handum nga matuod nga demokratikong pagbag-o, hustisya sosyal kag kahilwayan.

Mabuhay si kasamang Reynalde “Ka Amek” Erecre!
Mabuhay si kasamang Joem Golez!
Mabuhay ang rebolusyon!