Wala nagakalangkag ang pumuluyong Pilipino para sa ikatatlo nga State of the Nation Address (SONA) ni Pres. Ferdinand Marcos Jr sa maabot nga Lunes, Hulyo 22. Sa sulod sang iya pagginahum, wala sang may nakuha nga benepisyo ang pumuluyo, ilabi na ang mga Negrosanon, halin sa isa ka ido-ido, pasista, korap kag paantus nga rehimen.

Ang panahon sang SONA halin pa sa mga una nga mga rehimen, isa lamang ka palagwaon, pagpasundayag kag paghinugyaw sang mga dalagku nga komprador burgesya-agalon mayduta-burukrata nga mga nagahari nga sahi sang ila naagum nga kauswagan kag benepisyo gikan sa burukrasya. Sa tion sang SONA, magahulat sila sang anunsyo sang mga pasaborno nga igahaboy sa ila sang ila agalon sa dikta sang imperyalismong US kag magpamalakpak diri.

Wala sang balatyagon nga naggasto sang ₱20 milyones si Marcos Jr para sa palaabuton nga enggrande nga SONA bisan pa hagmak sa gutom kag kapigaduhon ang pumuluyo. Tinulo lang nga ayuda kag suporta ang nahatag sa pumuluyo sang iya rehimen.

Sa duha ka tuig, nag-antus sang tuman nga kalalaon sa ekonomiya ang malapad nga pumuluyo tungod sa todo larga nga pagpatuman sang patakaran neoliberal. Nagpasirit ini sang implasyon sang sandigan nga balaklon kag sosyal nga serbisyo, apang wala sang kaakbang nga pagpasaka sa sweldo sang mga mamumugon kag dugang nga palangabuhian para sa pumuluyo, ilabi na sa mga mangunguma.

Diri sa Negros, nagdagsa ang mga neoliberal nga proyekto sang mga dumuluong nga korporasyon kag lokal nga dalagku nga komprador sa kasyudaran kag kaumhan. Mas ginpalig-on ang kapit kag ginkonsolida ang gahum sa ekonomiya kag pulitika sang mga asyendero-kumprador kahimbon ang mga burukrata kapitalista paagi sa pag-aprobar sa Negros Island region (NIR) nga ginsakop pati ang Siquijor. Magapabakud pa ini sa sosyal nga base ni Marcos Jr diri sa isla.

Ginatikal man ni Marcos Jr paagi sa iya mga mersenaryo kag berdugo nga Armed Forces of the Philippins (AFP) kag Philippine National Police (PNP) ang kuno pagwasak sa bilog nga rebolusyonaryo nga kahublagan. Bangud sini, idalum sa paghari ni Marcos Jr, ginpuno niya sang dugo sang mga inosente nga sibilyan ang iya kamot. Sa isla sang Negros, naglab-ot sa masobra 700 ka mga insidente sa bayolasyon sang tawhanon nga kinamatarung sang AFP kag PNP kon sa diin indi magnubo sa 52,800 ang mga biktima. Lakip na diri ang 47 nga ginpamatay nga mga mangunguma kag apat ka biktima sang pagpang-abdak nga tubtob subong wala pa makita.

Wala sang kaluoy nga gin-atake ang pumuluyo sang AFP-PNP agud mapaburan ang duso sang imperyalismong US nga magaliso na sa pang-eksternal nga depensa. Sa subong, todo-larga na ang preparasyon sa ginaluto nga gyera sang imperyalismong US batuk sa China kon sa diin gamiton nga patag-awayan ang Pilipinas.

Pagalauman nga ang pagpagamit sang Pilipinas para sa proxy war sang US magabutang sa bug-os nga pungsod sa kumunoy sang gyera. Mas grabe nga delubyo ang maaguman sang bug-os nga pumuluyong Pilipino pareho sa nagakatabo subong sa Ukraine kag Gaza Strip.

Sa palaabuton nga SONA, imbes nga hatagan prayoridad ang gyera kag masingki nga militarisayon sa kaumhan, ginahangkat sang NDF-Negros ang rehimen US-Marcos nga sabton ang mga hinaing kag demanda sang pumuluyo kaangay sang matuod nga reporma sa duta, pungsodnon nga industriyalisasyon kag paghatag sang libre nga serbisyo sosyal. Kon indi, wala na sang padulungan ang pumuluyo kundi ang magbato.

Indi dapat pakagamayon ang kusog sang pumuluyo kag rebolusyonaryong kahublagan sang US-Marcos II nga rehimen. Sa kasaysayan, pareho sa panahon sang diktaduryang US-Marcos kag rehimen US-Estrada, ang nagahiliugyon nga kusog sang pumuluyo upod sa NPA amo ang makapalayas sa isa ka reaksyunaryo nga rehimen nga nagapaluntad sa isa ka mapiguson kag mahimuslanon nga sistema. ###