Sniping Operation sang NPA Nagmadinalag-on

Lubos nga ginadayaw sang Leonardo Panaligan Command-New People’s Army ang madinalag-on nga sniping operation sang NPA batok sa operating troops sang berdugong 62nd IB sadtong Enero 15, 2023 alas 3:00 sang hapon sa sityo Palasan, Brgy Guba, Vallehermoso, Negros Oriental. Patay ang 1 ka katapo sang 62nd IB samtang nagdinalagan ang iban pa. Ginhinago naman sang miitar sa mga residente kag publiko ang ila kaswalti. Matawhay naman ang NPA nga naka-atras.

Ginapakamalaot man sang LPC-NPA ang mga kabutigan ni Col. William Pesase sang 62nd IBPA. Wala sang natabo nga engkwentro sadtong Enero 15, 2023 sang kaagahon sa sityo Cambaogon, Brgy Trinidad, Guihulngan. Ang kamatuoran, ginpaarakan sang mga pasistang militar ang puluy-an ni Rodrigo Pasinabo sa nasambit nga lugar. “Buka na nga plaka” ang masami ginahambal sang militar “nga may 5 ka minutos nga engkwentro nga natabo kag kon may mapatay nga sibilyan, kabigon nga katapo sang NPA nga ginbayaan sang ila mga kaupod.”

Desperado gid ang pasistang militar, imbes nga lagson kag dugmukon ang NPA padayon nga nagabato kag militar pa ang masami maka-agum sang kaswalidad. Makahuluya man kay ang mga pumuluyo kag inosenteng sibilyan ang ila nga paukpan.

Gamiton ang kaalam kag kaisog! Padayon nga palig-unon ang baseng masa, ilunsar ang agraryong rebolusyon upod ang paglunsar sang lapnagon kag madinalag-on nga taktikal nga opensiba batok sa demoralisado, watak-watak kag desperadong militar!

Sniping Operation sang NPA Nagmadinalag-on