Read in: English

Signipikante nga kadalag-an para sa masa kag rebolusyonaryong pwersa sa Negros ang mga aksyong militar sang Roselyn Jean Pelle Command – New People’s Army (RJPC-NPA) diri sa Norte ka Negros.

Sadtong Setyembre 4, ginsilotan sang RJPC-NPA ang isa ka supog nga kontra-rebolusyonaryong ahente sa Military Intelligence Battalion (MIB) nga ara sa idalom sang 3rd Infantry Division (3rd ID) sang Armed Forces of the Philippines (AFP) nga nakabase sa Iloilo. Nakumpiska halin kay Benedicto Omblero sang Barangay Laga-an, Calatrava ang 2 ka kalibre .45 nga pistola kag mga bala nga gin-isyu sa iya sang pasistang AFP.

Si Omblero, ginareklamo sang masa bilang abusador kag tigbaligya sang armas kag iligal nga droga sa amo nga lugar. May ara siya proteksyon halin sa mga dalagkong kumprador-agalon mayduta, koraptong pulitiko, kag opisyal sang pulis kag militar.

Direkta nga imbolbado si Omblero sa pagpatay sa lider-mangunguma kag radio anchor nga si Julius Barellano, nga gintiro-patay sa mando sang despotiko nga agalon mayduta sadtong Hunyo 2018. Si Barellano, isa ka lider sa paghimakas sang masa batok sa pagpang-ilog sang duta sang mga mangunguma sa Hacienda Medina, San Carlos City.

Dugang nakumpirma sang RJPC-NPA ang trabaho ni Omblero bilang sekretong aset ukon intelligence agent sang AFP sa iya mga ID kag mission order. Myembro si Omblero sa anti-komunistang organisasyon nga ANAD nga amo ang tigdoso kag tigpatuman sang red-tagging, pagpang-aresto kag pagpamatay sa mga progresibong aktibista, mga sibilyan kag ordinaryong mangunguma sa bilog pungsod.

Aktibo sa subong ang pumuluyo kag mga organisadong pwersa sang Negros sa pag-upod kag pakigkooperar sa armadong rebolusyonaryong kahublagan agud mahatagan sang hustisya ang mga biktima sang pagpang-abuso sang pasistang rehimeng US-Duterte kag mga alipures sini sa AFP, PNP, paramilitar kag iban pa nga malain nga elemento sa kaumahan. Indi sila nagapangduha-duha nga magsang-at sang mga reklamo sa matuod-tuod nga gobyerno sang katawhan bangud nga andam ang Bag-ong Hangaway sang Banwa o BHB sa pagdepensa sa katawhan batok sa mga abusadong pasistang kriminal diri sa Negros.

Gani muklat ang masa sa Norte ka bahin ka Negros sa mga lakang sang demokratikong gubyerno sang banwa kag RJPC-NPA batok sa pipila ka mga kontra-rebolusyonaryo kag malain nga elemento nga ginwarningan, gin-disarmahan, ug ginpanaogan sang punitibo nga aksyon. Nagapanugyan ang RJPC sa iban pa nga mga akusado nga magkooperar kag makigsugilanon sang matawhay sa pag-atubang sang ila mga kaso nga gin-sang-at sang pumuluyo. Kaila na kamo kung sin-o kamo.

Determinado ang RJPC-NPA sa pagpanaog sang rebolusyonaryong hustisya labi na batok sa mga abusadong nagahimulos sa subong nga sitwasyon kag krisis sang pandemyang COVID-19. Ang madugoong kampanya sang rehimeng US-Duterte sa mapintas nga pagpang-ipit, pwersa nga pagpapasurender, mga ekstra-hudisyal nga pagpamatay o EJK, kag pagtanom sang kahadlok sa kubay sang masang mangunguma kag pumuluyo sang EO70 National Task Force kag Anti-Terror Law, dapat gid lang atubangon paagi sang pagpasingki sang inaway banwa kag pagpa-init sa militansya sang masa. ###