Sa pihak sang grabe nga pag-antus sa kapiot nga pagpangabuhi sang mga mangunguma sa kaumahan tuga sang El Niño, wala man puas ang kakugmat, dislokasyon kag perwisyo nga naaguman sang pumuluyo tuga sang militarisasyon sa Central Negros.

Sa Mangkas o La Carlota City, Negros Occidental, masobra na sa tatlo ka bulan nga militarisado ang mga baryo sang Ara-al kag Yubo sa nasambit nga banwa halin pa sadtong Pebrero 3 hasta subong Abril 24, 2024. Biktima ang mga pumuluyo sang pasistang 62nd IB sa pagpanaka-saka sa mga kabalayan, pagpamahug, interogasyon, pagpugong sa pagkadto sa ila mga uma kag pilit nga pagpatawag kag pagpatambong sa mga pulong-pulong. Masami nagatiner ang militar sa mga buluthuan nga nagperwisyo kag disturbo sa mga manunudlo lakip na ang mga kabataan. Biktima man ang kadam-an sang mga mangunguma sa ginahimo nga curfew sa lugar.

Subong, Abril 24- halos apat ka kolum sang berdugong 62nd IB malapit sa lugar. Makit-an sang nga pumuluyo sa Sityo Nailab, Barangay Ara-al kag Sityo Bai’s, Barangay Yubo tanan sang La Carlota City. Samtang may kolum man sang pasistang tropa sa mga sityo sang Linggahub kag Mercedes tanan sang Barangay Sag-ang, La Castellana, Negros Occidental.

Sa pihak nga bahin, alas 5:00 sang kaagahon sini nga adlaw, Abril 24 nahisayran sang mga pumuluyo sang Barangay Sebucawan, Isabela, Negros Occidental ang apat ka reo military truck kargado sang kapin sa 60 ka elemento sang mersenaryong tropa ang ginbubo sa lugar. Samtang sini man nga aga, 30 ka single nga motor nga kargado sang tag-duha ka militar upod sa duha ka patrol car sang PNP nga kargado man sang tag-10 ka elemento sang mga kapulisan ang nagapataklad sa Sityo Cuyaoyao, Barangay Quintin Remo, Moises Padilla, Negros Occidental.