KONSTITUSYON SANG PARTIDO KOMUNISTA SANG PILIPINAS

Preyambulo

Ang pag-aplikar sang unibersal nga kamatuoran sang Marxismo-Leninismo-Kaisipang Mao Zedong sa kongkreto nga praktika sang rebolusyon nga Pilipino amo ang pinakamataas nga katungdanan sang Partido Komunista sang Pilipinas.

Ang Partido Komunista sang Pilipinas isa ka proletaryo nga rebolusyonaryo nga Partido nga nagakuha sang pagtulun-an halin sa tanan nga nagligad nga rebolusyonaryo nga paghimakas sang pumuluyo nga Pilipino kag halin sa mga dungganon nga pagtulun-an nanday Marx, Engels, Lenin, Stalin kag Mao Zedong. Nagadungan ini sa pagsulong sang teorya kag praktika sang kalibutanon nga proletaryo nga rebolusyon kag ginagiyahan sang Marxismo-Leninismo-Kaisipang Mao Zedong.

Ang Partido Komunista sang Pilipinas malig-on nga nagapamatok sa moderno nga rebisyunismo kag sa tanan nga huyog sang suhetibismo, "Wala" ukon "Tuo" nga oportunismo, liberalismo kag sektaryanismo nga amo ang target sang wala untat nga pagtadlong kag rebolusyonaryo nga pagbantay.

Matutom nga nagahimakas ang Partido agud mangin pinakaabanse nga destakamento kag prinsipal nga instrumento sang proletaryado, sa subong nga halintang sang demokratiko nga rebolusyon sang banwa batok sa duha ka nagapanguna nga kaaway, ang imperyalismo nga E.U. kag pyudalismo, kag sa madason nga halintang sang sosyalista nga rebolusyon.

Permi nagatinguha ang Partido nga mapauswag ang pinakahugot nga angot sa masa nga mamumugon kag mangunguma sa bug-os nga kapuluan. Ginagamit sini ang pagsaway kag pagsaway sa kaugalingon agud mapabilin ang husto nga makasahi nga panindugan kag estilo sang pagtrabaho.

Agud mapukan ang mga imperyalista nga Amerikano, daku nga burgesya komprador, agalon nga mayduta kag burukrata kapitalista, ginagamit sang Partido ang mga hinganiban sang pangmalawigan nga inaway banwa kag pungsudnon nga nagahiliugyon nga prente. Ginasakdag sang Partido ang pagpamuno sang sahi nga proletaryado, ginatukod ang sandigan nga alyansa sang sahi nga mamumugon kag sahi nga mangunguma, kag ginabuyok man ang petiburgesya kag ang banwahanon nga pungsundon nga burgesya sa bahin sang demokratiko nga rebolusyon sang banwa.

Sa paglunsar sang inaway banwa, ang Partido mayor nga nagasalig sa malapad nga pagsakdag sang sahi nga mangunguma, labi na sang imol nga mangunguma kag mamumugon sa uma. Ginapauswag sang Partido ang rebolusyonaryo nga pwersa sa kaumhan agud dugmukon didto ang haligi sang pyudalismo kag armado nga kontra-rebolusyon kag agud palibutan ang mga suydad halin sa mga rebolusyonaryo nga base tubtob handa na nga agawon sang demokratiko nga pwersa sang banwa ang gahum sa kasyudaran.

Pungsudnon kag internasyunalista nga katungdanan sang Partido Komunista sang Pilipinas nga pukanon ang imperyalismo nga Amerikano, pyudalismo kag tanan nga lokal nga reaksyon. Ang pungsudnon kag pangkatilingban nga paghilway sang pumuluyo nga Pilipino magapaluya sa mga imperyalista kag tanan nga reaksyunaryo sa kalibutan nga sakop kag magapabaskog sa mga utod nga Partido kag pumuluyo sa ila matarung kag progresibo nga paghimakas. Paagi sa dulungan nga paghulag santo sa prinsipyo sang proletaryo nga internasyunalismo kag santo sa polisiya sang nagahiliugyon nga prente, ang lubos nga pagkarumpag sang imperyalismo nga E.U. ang kalibutanon nga kadalag-an sang sosyalismo pat-ud nga matabo sa panahon sang Marxismo-Leninismo-Kaisipang Mao Zedong.

Armasan naton ang aton kaugalingon sang indi malutos nga Marxismo-Leninismo-Kaisipang Mao Zedong!

I II III IV V VI VII VIII IX X XI Back to top