ARTIKULO IV. ISTRUKTURA KAG MGA PRINSIPYO SANG PARTIDO

Seksyon 1. Ang istruktura sang Partido nasandig sa prinsipyo sang demokratiko sentralismo, buot silingon, sentralismo nga nasandig sa demokrasya kag demokrasya nga napaidalom sa sentralisado nga pagpamuno.

Ang mga sandigan nga kondisyon amo ang masunod:

a. Ang mga nagapamuno nga organo sang Partido sa tanan nga lebel pagapilion kag may salabton sa mga organisasyon ukon kumperensya sang Partido nga nagpili sa ila.

b. Matapos ang hilway kag maid-id nga diskusyon, ang mga desisyon sang Partido ipatuman nga wala sang pagpasulabi.

1. Ang indibidwal napaidalom sa organisasyon;

2. Ang minorya napaidalom sa mayorya;

3. Ang manubo nga lebel napaidalom sa mas mataas nga lebel;

4. Ang bug-os nga katapuan napaidalom sa Komite Sentral kag sa Pungsudnon nga Kongreso.

k. Ang mga nagapamuno nga organo sang Partido dapat maghatag permi sang daku nga pagtamud sa mga pahayag kag opinyon sang mga manubo nga organo kag sang masa sang katapu sang Partido, kag magtuon permi sang mga kongkreto nga inagihan kag maghatag sang napanahon nga bulig sa paglubad sang mga palaligban.

d. Ang mga manubo nga organisasyon sang Partido kinahanglan nga magsumite sang mga regular kag espesyal nga pahayag nahanungod sa ila hilikuton sa organisasyon nga mas mataas sa ila kag kinahanglan nga magpangabay sang napanahon nga giya nahanungod sa mga palaligban nga nagakinahanglan sang desisyon sang mas mataas nga organo sang Partido.

Seksyon 2. Ang isa ka organisasyon sang Partido pagatukuron sandig sa dibisyon nga pangteritoryo ukon sakop sang hilikuton.

a. Ang organo sang Partido nga nagadumala sa hilikuton sang isa ka teritoryo amo ang pinakamataas nga organo sa amo nga teritoryo.

b. Ang organo sang Partido nga nagadumala sa hilikuton sang Partido sa isa ka patag sang hilikuton ukon sa isa ka organisasyon pangmasa amo ang pinakamataas nga organo sa amo nga patag sang hilikuton ukon organisasyon pangmasa.

Seksyon 3. Ang istruktura sang mga organisasyon sang Partido kag ang mga nagapamuno nga organo nila amo ang masunod

a. Para sa bug-os nga Pilipinas, ang bug-os nga katapuan sang pungsudnon nga organisasyon sang Partido, ang Pungsudnon nga Kongreso kag ang Komite Sentral.

b. Para sa mga rehiyon, ang mga rehiyunal nga organisasyon sang Partido, ang mga rehiyonal nga kumperensya kag mga rehiyonal nga komite.

k. Para sa mga probinsya, ang mga probinsyal nga organisasyon sang Partido, ang mga probinsyal nga kumperensya, kag probinsyal nga komite.

d. Para sa mga distrito, ang mga pangdistrito nga organisasyon sang Partido, ang pangdistrito nga kumperensya kag ang pangdistrito nga komite.

e. Para sa mga munisipalidad kag subdistrito sang Manila, ang mga Seksyon sang Partido, ang mga pangseksyon nga kumperensya kag ang mga pangseksyon nga komite.

g. Para sa mga pabrika, minahan, plantasyon kag asyenda, baryo, kalye, talatapan, buluthuan kag mga lugar puluy-an, ang mga sanga sang Partido, ang mga pulong sang sanga kag ang mga komite nga manugpatuman sang sanga.

Seksyon 4. Ang pinakamataas mga pamunuan sang bug-os nga Partido amo ang Pungsudnon nga Kongreso; ang sa rehiyon, probinsya, distrito kag Seksyon amo ang natungdan nga kumperensya, kag ang sa sanga sang Partido amo ang pulong sang sanga.

Sa tunga sang mga pulong sang sanga, mga kumperensya sang Partido kag pungsudnon nga kongreso, ang mga napilian nga komite snag Partido amo ang nagapamuno nga organo sang organisasyon sang Partido sa kada lebel.

Seksyon 5. Ang tanan nga nagapamuno nga organo pagapilion:

a. Ang Komite Sentral pagapilion sang Pungsudnon nga Kongreso.

b. Ang mga komite sa tagsa ka lebel pagapilion sang kumperensya sang Partido sa tagsa ka natungdan nga sakop.

k. Ang mga komite nga manugpatuman sang sanga pagapilion sang mga pulong sang sanga.

Ang Komite Sentral amo ang magahanda sang mga talaksan kag pamaagi sa eleksyon. Sa mga sirkumstansya nga ang kahimtangan wala nagatugot sang paghiwat sang eleksyon, ang mga nagapamuno nga organo sang Partido pagapilion sang mga mataas nga komite sang Partido.

Seksyon 6. Ang mga katapu sang Komite Sentral dapat mangin aktibo nga katapu sang Partido sa sulod sang indi magkubos sa tatlo sa ka tuig.

Seksyon 7. Ang mga nagapamuno nga organo kag mga katapu sini mahimo bungkagon ukon pahalinon sang mga organisasyon sang Partido nga nagpili sa ila ukon sang mga organo sang Partido nga nagtalana sa ila, bisan wala pa matapos ang panahon sang ila pag-uyat sang katungdanan.

Sa tunga sang mga kumperensya sang partido sa bisan ano nga lebel, mahimo kuhaon kon kinahanglanon, sang mas mataas nga komite sang Partido ang mga nagadumala sa mas manubo nga organisasyon sang Partido./

Seksyon 8. Ang pagtukod sang isa ka bag-o nga organisasyon ukon pagbungkag sang isa ka natukod na pagadesisyunan sang organisasyon nga madason nga mas mataas diri.

Seksyon 9. Ang mga komite sang Partido halin sa pangseksyon tubtob sa rehiyunal nga organisasyon sang Partido magatukod sang mga departamento, buro, komisyon kag iban pa nga organo santo sa ila kinahanglanon.

Seksyon 10. Ang mga organisasyon sang Partido sa bisan ano nga lebel mahimo maghiwat sang nanuhay-tuhay nga porma sang mga pulong, seminar ukon kumperensya sang mga kadre kag aktibo nga katapu agud repasuhon ukon himuan sang plano ang ila hilikuton ukon hambalan ang mga importante nga desisyon sang mga mas mataas nga organo sang Partido.

Seksyon 11. Antes desisyunan sang isa ka nagapamuno nga organo sang Partido ang isa ka polisiya, mahimo nga hilway nga hambalan ini sang mga mas manubo nga organisasyon sang Partido kag mahimo sila maghatag sang mga suhestyon sa nagapamuno nga organo sang Partido. Matapos himuon ang isa ka desisyon, dapat nila sundon ini.

Subong man, kon sa pagtan-aw nila wala nagasanto ang desisyon sa kahimtangan sang isa ka teritoryo ukon linya sang hilikuton, mahimo sila magpangabay sang rekonsiderasyon sa desisyon. Kon tindugan sang mas mataas nga organo sang partido ang desisyon sini pagkatapos sang nagakaigo nga diskusyon dapat ini ipatuman sang mga manubo nga organisasyon sang partido.

Seksyon 12. Ang Komite Sentral amo ang organo nga magahimo sang mga desisyon kag magapagwa sang mga pahayag nahanungod sa mga polisiya nga pungsudnon ang kinaiya bisan nga ang mga mas manubo nga organisasyon kag ila mga nagapamuno nga organo mahimo magdiskusyon sa amo nga mga bagay kag ginalauman nga maghatag sang ila mga opinyon sa mga sentral nga nagapamuno nga organo, may kinamatarung sila sa paghimo sang kaugalingon nga desisyon kag pagpagwa sang ila pahayag, nahanungod lamang sa mga lokal nga bagay nga sakop sang ila teritoryo.

Seksyon 13. Ang tanan nga publikasyon sang Partido dapat magpalapnag sang mga polisiya ag desisyon sang Partido.

Ang tanan nga organisasyon sang Partido dapat magpalapnag sang mga publikasyon sang Komite Sentral. Ang tanan nga lokal nga publikasyon sang Partido kinahanglan nga magkuha sang pahanugot sang nagapamuno nga organo sang Partido sa diin ini direkta nga napaidalom.

Preyambulo
I II III IV V VI VII VIII IX X XI
Balik sa Ibabaw