ARTIKULO II. PAGTAPU

Seksyon 1. Ang sin-o man nga pumuluyo ukon nagapuyo sa Pilipinas, nga indi magnubo sa 18 ka tuig ang pang-edaron, nagapati sa Marxismo-Leninismo-Kaisipang Mao Zedong, sa Programa kag Konstitusyon sang Partido Komunista sang Pilipinas kag nagapasugot nga magtrabaho sang bug-os katutom sa isa sang mga organisasyon sang Partido, magatuman sang mga desisyon sang Partido, kag magbayad sang butaw sa pagsulod kag regular nga bulanan nga butaw, mahimo batunon nga katapu sang Partido.

Seksyon 2. Ang pagtapu sa Partido mangin balido sa indibidwal nga basehan lamang kag suno sa mga masunod nga pamaagi sa pag-areglar sang pagbaton sang mga katapu:

a. Ang mga mamumugon, mamumugon sa uma, imol nga mangunguma, imol nga mangingisda ukon imol sa syudad mahimo mangin katapu sang Partido sa rekomendasyon sang duha ka katapu sang Partido nga may maayo nga tindog pagkatapos batunon sang pulong sang sanga, ukon kon ginapangayo sang kahimtangan, sang komite nga manugpatuman sang sanga, kag pagkatapos sang anum ka bulan nga pagkakandidato nga katapu.

b. Ang mga nahanunga nga mangunguma, nahanunga nga mangingisda, empleyado, manughimo sa kamot, magagmay nga negosyante, intelektwal ukon propesyunal, estudyante kag iban nga sektor sang petiburgesya mahimo mangin katapu sang Partido sandig sa rekomendayson sang duha ka katapu sang Partido nga may isa ka tuig nga maayo ang tindog sa Partido, matapos batunon nga katapu paagi sa desisyon sang komite nga manugpatuman sang sanga ukon grupo sang Partido sa isa ka organisasyon pangmasa kag pagkatapos sang isa ka tuig nga pagkakandidato nga katapu.

k. Yadtong may mga tindog pangkatilingban nga luwas sa mga nasambit sa subseksyon a kag b mahimo mangin katapu sandig sa rekomendasyon sang duha ka katapu nga may sagunson nga tatlo ka tuig nga maayo nga tindog sa Partido, matapos batunon sang komite nga manugpatuman sang sanga ukon grupo sang Partido sa isa ka organisasyon pangmasa kag pagkatapos sang duha ka tuig nga pagkakandidato nga katapu.

Seksyon 3. Ang tagsa ka katapu sang Partido nga nagarekomendar sang isa ka tawo agud mangin katapu sang Partido dapat maghatag sang responsable kag matuod nga pahayag sa Partido nahanungod sa ideolohiya, pangpulitika nga rekord kag personal nga kinaiya kag kasaysayan sang tawo nga natungdan. Dapat niya hatagan sang nagakaigo nga paghangop sa Marxismo-Leninismo-Kaisipang Mao Zedong, Programa, Konstitusyon, polisiya kag desisyon sang Partido ang iya ginarekomendar. Dapat pormal nga sabton sang ginarekomendar ang isa ka istandard nga giya sang palamangkutanon nga ginhanda sang Partido.

Antes maghimo sang ano man nga desisyon sa pagbaton sang isa ka kandidato nga katapu, ang natungdan nga komite nga manugpatuman ukon grupo sang Partido dapat nga magpili sang isa ka may katungdanan sa Partido agud maghimo sang masangkad nga pagpakigbayluhanay sang panghunahuna sa tawo nga nagahandum nga mangin katapu sang Partido agud makilala ang natungdan kag mausisa ang tanan nga malahalon nga impormasyon.

Seksyon 4. Sa mga pinasahi nga kahimtangan, ang mas mataas nga komite sang Partido kag grupo sang Partido sa organisasyon pangmasa mahimo nga direkta nga magbaton sang bag-o nga katapu.

Seksyon 5. Ang mga natungdan nga organo sang Partido dapat maghatag sa mga kandidato nga katapu sang panugod nga ihibalo sa Marxismo-Leninismo-Kaisipang Mao Zedong kag Programa kag Konsitusyon sang Partido, magtalana sang pagtilaw sa hilikuton pangpartido kag magdumala sang ila pag-uswag sa pulitika.

Mahimo palawigon ukon palip-uton sang pulong sang Partido, sang komite ukon grupo sang Partido ang panahon sang pagkakandidato nga katapu sandig sa pagtrabaho kag katutom sang kandidato nga katapu.

Ang istatus sang pagkakandidato nga katapu pagadulaon kon maathag nga wala nagasabat sa rekisito nga mangin katapu sang Partido ang natungdan.

Preyambulo
I II III IV V VI VII VIII IX X XI
Balik sa Ibabaw