ARTIKULO I. NGALAN, HAYAHAY KAG SIMBOLO, AMBAHANON KAG SUMPA

Seksyon 1. Ang ngalan sang organisasyon nga ini amo ang Partido Komunista sang Pilipinas. Kon kinahanglanon, ituhay sang Partido ang kaugalingon sa ngalan kag kaundan sang Partido Komunista sang Pilipinas (Gintingob nga Partido Sosyalista kag Partido Komunista) paagi sa pagdugang sang tinaga, Marxista-Leninista ukon Kaisipan Mao Zedong sa sulod sang parentesis.

Seksyon 2. Pula ang hayahay sang Partido nga may simbolo nga maso kag garab nga bulawan ukon puti nga duag.

Seksyon 3. Ang ambahanon sang Partido amo ang Internasyunal.

Seksyon 4. Ang sumpa sang Partido amo ang masunod:

"Ako si _________________, nagapasugot sang akon lubos nga pagpasugot sa teorya kag praktika sang Marxismo-Leninismo-Kaisipang Mao Zedong, sa Programa kag Konstitusyon sang Partido Komunista sang Pilipinas, kag sa tanan nga desisyon sang mas mataas nga organo sang Partido kag sang yunit sang Partido nga ginatapuan ko.

Nagasumpa ako nga tumanon ang tanan ko nga hilikuton kag katungdanan sa maabot sang akon ikasarang, pataason ang akon proletaryo nga rebolusyonaryo nga kamuklatan, permi nga mag-alagad sa pumuluyo kag mangin malapit sa ila, pangapinan kag ipakigsumpong ang interes sang pumuluyo, ipabilin nga mataas ang dungog kag prestihiyo sang Partido, amligan ang seguridad sang Partido kag tanan nga kaupod ko kabuhi ko man ang ihalad kon kinahanglanon, bug-os katampad nga sawayon ang mga kasaypanan kag kahuyangan ko subong man sang akon mga kaupod agud pauswagon ang pagtrabaho kag estilo sa pagtrabaho sandig sa husto nga makasahi nga panindugan kag agud mabug-os ang kusog, kag isulong ang kawsa sang Partido kag sang masa. Gamiton ko ang tanan nga kahigayunan agud mapalapnag ang Marxismo-Leninismo-Kaisipang Mao Zedong kag mapatuman ang proletaryo nga rebolusyonaryo nga linya sang Partido."

Ang sumpa nga ini pagahimuon sa tion nga ang isa ka tawo magasulod bilang kandidato nga katapu kag sa tion nga ang isa ka kandidato nga katapu ginabaton bilang lubos nga katapu sang Partido.