ARTIKULO III. MGA KINAMATARUNG KAG KATUNGDANAN SANG MGA KATAPU

Seksyon 1. Ang mga katungdanan sang mga katapu sang Partido amo ang masunod:

a. bug-uson ang paghiliusa kag kusog sang Partido paagi sa pagpataas sang lebel sang ila paghangop sa Marxismo-Leninismo-Kaisipang Mao Zedong kag paagi sa paggamit sini nga unibersal nga teorya sa mga kongkreto nga palaligban sang Partido sang demokratiko nga rebolusyon sang banwa;

b. ipaidalum ang personal nga interes sa interes sang Partido ukon sang masa sang pumuluyo, mag-alagad sa masa sang pumuluyo nga wala sang pagpangduha-duha, magtuon sa ila kag ipaathag sa ila ang mga polisiya kag desisyon sang Partido kag maghimo sang napanahon nga pahayag sa Partido nahanungod sa kinahanglanon kag handom sang pumuluyo;

k. pamatukan ang moderno nga rebisyunismo kag tanan nga sayup nga huyog sang pamensaron kag paghulag sa sulod sang Partido;

d. sundon ang Konstitusyon kag Programa sang Partido;

e. lubos nga tumanon ang linya sang Partido kag tanan nga partikular nga katungdanan nga ginatalana sa ila;

g. tun-an sang husto ang ila natalana nga hilikuton kag mangin maayo nga halimbawa sa disiplina, matutom nga pagtrabaho, pagkamainubuson kag simple nga pagpangabuhi sa sulod sang organisasyon sang Partido, organisasyon pangmasa kag sa kubay sang mga pumuluyo;

h. maghimo sang pagsaway kag pagsaway sa kaugalingon agud maplastar ang mga kasaypanan kag mga kahuyangan, magtinguha sang labi nga pangibabawan kag tadlungon ang mga ini kag pauswagon ang ila hilikuton pangpulitika;

i. magtrabaho sa isa ka partikular nga organisasyon sang partido kag permi nga magtambong sa mga sinapol;

l. regular nga magtambong sa mga kurso sa pagtuon kag regular nga magbasa kag magpalapnag sang mga publikasyon sang partido;

m. mangin tampad sa Partido kag maghatag sang tanan nga kinahanglanon nga datos agud makahimo sang husto nga desisyon;

n. maghatag sang napanahon nga butaw; kag

ng. mangin handa sa bisan ano nga bagay ukon hitabo sa sulod ukon sa gwa sang Partido nga makatuga sang katalagman sa Partido kag pamatukan ang tanan nga butang nga makahalit sa kaayuhan sang Partido kag sang pumuluyo.

Seksyon 2. Ang mga kinamatarung sang katapu sang Partido amo ang masunod:

a. hilway nga magpartisipar sa mga diskusyon kag pulong sang Partido nahanungod sa mga teoretikal kag pulitikal nga palaligban angot sa mga linya, polisiya kag desisyon sang Partido;

b. magboto kag mabotohan sa sulod sang Partido;

k. magpabutyag sang mga suhestyon, pahayag ukon reklamo sa bisan ano nga organisasyon ukon organo sang Partido sa bisan ano nga lebel;

d. magsaway sa bisan ano nga organisasyon, organo ukon bisan sin-o nga katapu sang Partido a mga pulong;

e. mangusisa sa kwalipikasyon sang bisan sin-o nga kandidato para sa bisan ano nga katungdanan ukon komite;

g. magpangabay sang rekonsiderasyon sa bisan ano nga desisyon sa mas mataaas nga organo tubtob sa Komite Sentral kag Pungsudnon nga Kongreso; kag

h. magpangabay nga magtambong sa bisan ano nga sinapol nga ginapatawag sa pag-ebalwar sang ila kinaiya, hilikuton ukon bisan ano nga aksyon pangdisiplina nga igahatag sa ila luwas lang kon mahilabtan ang seguridad sang Partido.

Seksyon 3. Ang mga katungdanan kag mga kinamatarung sang kandidato nga katapu kasubong man sa mga lubos nga katapu sang Partido, magluwas lang nga wala sila sang kinamatarung sa pagboto ukon mabotohan kag wala sang tingog as paghimo sang desisyon sa sulod sang Partido.

Seksyon 4. Ang mga kandidato ukon lubos nga katapu sang Partido hilway nga maghalin sa Partido. Ang kada paghalin lubos nga ipaathag sa sulod sang natungdan nga komite sang Partido.

Seksyon 5. Ang tagsa ka katapu sang Partido, ano man ang iya kasampaton kag katungdanan, nga wala nagatuman sang iya katungdanan ukon wala nagatahud sang mga kinamatarung sang iya mga kaupod pagasawayon kag hatagan pagtuon. Ang mga malubha nga paglapas sang mga kinamatarung kag katungdanan pagahatagan sang nagakaigo nga aksyon pangdisiplina.

a. Ang bisan ano nga aksyon pang disiplina sa mga katapu sang Partido pagadesisyunan sang mga sanga ukon grupo sang Partido sa organisasyon pangmasa nga ginatapuan nila; apang kon ang silot nga igahatag amo ang pagpahalin, kinahanglan ang pagpasugot sang madason nga mas mataas nga komite sang Partido.

b. Ang bisan ano nga aksyon pangdisiplina sa isa ka katapu sang komite san Partido pagadesisyunan sang kumperensya nga nagpili sa iya sa amo nga katungdanan ukon sang isa ka mas mataas nga komite sang Partido.

k. Ang bisan ano nga aksyon pangdisiplina sa isa ka katapu ukon kandidato nga katapu sang Komite Sentral pagadesisyunan sang pangkabilugan nga pulong sang Komite Sentral.

Seksyon 6. Ang mga aksyon pangdisiplina igahatag santo sa kabug-aton sang paglapas sang disiplina sang Partido kag ang mga ini mahimo nga isa sa mga masunod: paandam, mabaskog nga paandam, pagkuha sa hilikuton nga una ginatalana, paghatag sang pagtilaw nga hilikuton, suspensyon ukon pagpahalin sa Partido.