Nagapadaku nga utang sa ngalan sang pandemya
Gin-anunsyo sang rehimeng Duterte sang Agosto 6 ang plano sini nga mangutang sang dugang nga Ᵽ3 trilyon sa masunod nga tuig. Pagagamiton sang rehimen ang mga utang agud tabunan ang permi nga depisito sa badyet sang pungsod. Pareho sa nagtaliwan nga tuig, labaw nga kulang ang pondo para sa mga plano sini nga gastuhon kag nakatalana nga bayaran nga utang.
Ang pagautangon katumbas sang 67% sang ginaplano nga ₱4.5 trilyon nga nasyunal nga badyet para sa 2021. Buot silingon, sa kada napulo ka piso nga pagagastuhon sang reaksyunaryo nga gubyerno, halos pito ka piso ang magahalin sa utang. Ang plano nga gastuhon sa masunod nga tuig mas mataas sang 10% sa ₱4.1 trilyon nga nasyunal nga badyet subong nga tuig.
Gin-ako sang bisan ang mga upisyal sa ekonomya sang rehimen nga labi pa nga magadaku ang depisito sa badyet sa palaabuton nga mga tuig labi pa nga ginalauman ang pagnubo sang makulekta sini nga buhis dulot sang nagapadayon nga mga lockdown sa nagkalainlain nga bahin sang pungsod. Siling nila, ginatantya nga nagalab-ot sa ₱1.82 trilyon ang depisito sa bilog nga 2020. Ini na ang mangin pinakamataas sa kasaysayan.
Suno sa estadistika sang rehimen, ₱560.4 bilyon na ang depisito sini sa badyet subong nga una nga tunga sang tuig. Mas mataas ini sang masobra 13 beses sa nalista sa pareho nga panahon sang nagligad nga tuig. Ang pagtimbuok sang depisito pangunahon nga resulta sang pagbagsak sang nakulekta nga buhis dulot sang malaparan nga lockdown nga nagpauntat sa produksyon kag iban pa nga ekonomiko nga mga aktibidad. Dugang pa diri ang dalagku nga insentiba sa pagbuhis nga ginhatag sang rehimen sa mga korporasyon sa panahon sang pandemya. (Basahon ang kaangut nga artikulo sa Ang Bayan, Hunyo 7.)
Kadungan sang pagtibusok sang kita sa buhis, ₱2.29 trilyon na lang ang pagakulektahon sang rehimen subong nga tuig, mas manubo sang 28% nga una sini nga gintarget. Sang Hulyo, wala pa sa 32% sini ang nakulekta.
Sa kadaku sang kakulangan sa pondo, ₱1.7 trilyon na ang wala-tuo nga gin-utang sang rehimen sa tabon sang “liwat nga pagpasikad sa ekonomya.” Masobra doble ini kumparar sa nagligad nga tuig.
Diin nagahalin ang pautang?
Suno sa gubyerno, 75% sang pagautangon sa porma sang mga bono o papeles sa pagpangutang, kag 25% man magahalin sa mga imperyalista nga bangko kag institusyon pangpinansya.
Sa nakalipas nga anom ka bulan, nakalista ang rehimen sang ₱1.3-trilyon nga pangsulod nga utang sa porma sang mga bono, kag ₱226-bilyon panggwa nga utang.
Para makapasikat sa mga dumuluong nga bangko, paliwat-liwat nga nagpabugal si Finance Sec. Carlos Dominguez nga indi tubtob san-o magauntat sa pagbayad sang utang ang Pilipinas bisan pa sa atubang sang pandemya. Sa una nga tunga sang tuig, ₱547.3 bilyon na ang ginbayaran nga utang sang rehimen samtang gutom kag wala sang trabaho ang pumuluyo. Masobra 34% sini bayad sa interes.
Para mapabilin ang mataas nga grado sa pagpangutang kag makaganyat sang magabakal sa mga bono sini, pirme nga nagadali-dali ang reaksyunaryo nga estado nga magbayad sang utang kag magpatuman sa mga neoliberal nga rekomendasyon nga ginapapanaog sang mga nagapautang. Ang grado nga ini ginahatag sang mga imperyalista nga “credit rating agency” sa pagpanguna sang ginatawag nga Big Three nga ginalakipan sang S&P Global Ratings (S&P), Moody’s kag Fitch Group nga pareho nga nakabase sa US kag ginatawohan sang mga teknokrata sang World Bank.