Gin-aresto kag gin-interogar sang 94th IB sang Nobyembre 14 ang 14-anyos nga bata nga babaye nga si Jelca Ariola sa Sityo Suba-Suay, Barangay Mahalang sa Himamaylan City, Negros Occidental sa akusasyon nga anak siya sang Pulang hangaway. Pauli halin sa eskwelahan si Ariola sang palapitan sang militar kag dal-on sa detatsment. Ginbuy-an siya pagkatapos ang pila ka oras nga pagpang-ipit kag pagpamahog. Sa pareho nga syudad, ginsapote kag gin-interogar sang 94th IB si Tata Balasabas sa Sityo Pisok, Barangay Buenavista sang Nobyembre 11.

Iligal nga gin-aresto ang mangunguma nga si Charlie Lelis sang Nobyembre 1 sa Barangay Sangat, Gubat, Sorsogon sa himu-himo nga kaso sang pagpatay kag tuyo nga pagpatay. Gindalahig si Lelis sa isa ka engkwentro sang Bagong Hukbong Bayan kag mga suldado.

Ginpalukpan sang M203 kag gin-istraping sang 203rd IBde ang mga bahin sang Barangay Rizal, Aguas, kag Pitogo sa Rizal, Occidental Mindoro, ala-1 sang kaagahon sang Nobyembre 6. Sa masunod nga adlaw, wala sang patugsiling nga ginpaulanan sang bala ang kaiping nga barangay sang Manoot, Rizal. Ginatantya nga 100 pamilya ang nagbakwit para sa ila nga kaluwasan.


Operasyon militar sa Negros

Halin Nobyembre 2, nag-operasyon na ang 300-400 tropa sang 62nd IB sa dulunan sang mga banwa sang Binalbagan kag Isabela sa Negros Occidental kag La Libertad sa Negros Oriental. Indi magnubo sa 10 barangay kag 20 sityo ang apektado sang amo nga operasyon. Sa pila ka lugar nagapatuman sang curfew ang mga suldado. Nagakampo man sila sa mga sentro sang barangay, balay sang mga residente kag iban pang sibilyan nga istruktura. Nagagamit sila sang mga drone nga nagadulot sang kahadlok sa mga residente bangud sa magahod sini nga tunog.

Sang Nobyembre 5, iligal nga gin-aresto si Tonie Elod pagkatapos halughugon sang 62nd IB ang iya nga balay sa Sityo Mabato, Barangay Talaon, La Libertad. Gindakop man nila si Joel Carpio, komprador sang baboy nga taga-Barangay Cansumandi. Ginbutangan sang plastik ang iya nga ulo samtang ginakastigo.

Pito ka mangunguma ang gin-interogar kag ginpahog sang mga suldado, kag indi magnubo sa lima ka pamalay ang ginsulod kag isa ka balay ang ginransak sa mga Barangay Macasilao kag Winaswasan sa Calatrava kag Barangay Bug-ang kag Magticol, Toboso sang Oktubre 19. Ang mga paglapas nga ini bunga sang bag-o nga bwelo sang mga nakapokus nga operasyon militar sa mga banwa sa Northern Negros halin Oktubre.