Nagabuang nga mga suldado sa mga baryo

Wala sang kaluoy nga ginpatay sang mga ahente sang estado si Rolando Patiño Leyson, Sr, 78, sang Septyembre 12 sa Barangay San Pedro, Sison, Surigao del Norte. Lima ka armadong lalaki ang nagsulong sa iya balay kag masobra 20 beses siya nga ginluthang. Gintarget si Leyson bangud lang nga kilala nga kumander sang Bagong Hukbong Bayan (BHB) sa prubinsya ang iya nga anak.

Antes sini, ginpatay man sang pareho nga grupo ang drayber sang traysikel nga si Jojie Udtohan Gayoso sang Septyembre 8 sa pareho nga barangay. Si Gayoso salaligan ni Leyson.

Sa Eastern Samar, ginpatay sang mga elemento sang 78th IB ang isa ka lalaki nga may balatian sa pamensaron sa Sityo Kabugawan, Barangay Aroganga, Dolores sang Agosto 16. Ginluthang ang biktima pagkatapos habuyon niya sang lubi ang isa ka suldado. Natabuan nga nasumalang nila ang biktima sa lugar kon sa diin naengkwentro nila ang isa ka yunit sang BHB.

Sa Negros Oriental, gin-aresto si Nonna Espinosa kag siyam nga iban pa sa Sityo Ilihan, Barangay Buenavista, Guihulngan City sang Septyembre 10. Gintago sila sang mga suldado sang 62nd IB kag tubtob subong wala pa mabisitahan sang ila mga paryente.

Sa Negros Occidental, tatlo ka mangunguma ang gin-ipit sang mga suldado sang 62nd IB nga nanglighot sa Barangay Budlasan, Canlaon City sang Septyembre 17. Pareho nga nagaasikaso sang mga ginasagod nga karabaw sanday Ernie Jocolbe kag Gilbert Reyes sang ipiton sila sang mga suldado. Ginpaandaman man si Romeo, utod ni Reyes. Iligal man nga ginhalughog sang mga suldado ang mga balay sa Sityo Natuling kag ginkawat ang mga kagamitan sang mga residente. Isa pa ka grupo sang pamatan-on ang gin-ipit sang nasambit nga yunit sa kaiping nga barangay.

Sa Western Samar, nadugangan pa ang mga baryo nga ginahalitan sang 87th IB kag 14th IB sa ngalan sang Retooled Community Support Program. Ginsakup sang operasyon sang militar ang mga barangay sang Hagbay kag Cataydungan sa San Jose de Buan, dugang sa nauna nga 33 barangay nga ila gin-okupar halin pa sang Mayo. Walo sa mga baryo nga ini ang ginhamlet, kon sa diin tubtob tatlo ka residente lang ang ginatugutan nga maggwa sa barangay.

Lider-drayber sa Bicol, gin-aresto

Gindakup sang gintingub nga pwersa sang militar kag pulis si Ramon Rescovilla sang Septyembre 9 samtang nagapauli sa Daraga, Albay. Gintamnan sang ebidensya nga pusil kag granada ang iya bag kag pagkatapos gindala siya sa presinto kon sa diin siya ginbakol. Ginpasakaan siya sang himu-himo nga kaso nga pagpatay.

Si Rescovilla bise presidente sang Pinag-isang Samahan ng mga Tsuper at Operator Nationwide (Piston) kag nagatindog nga tagapamaba sang Condor-Piston Bicol.

Sa Camarines Norte, gin-aresto ang mamahayag nga si Rommel Fenix kag apat pa nga mamahayag sang Septyembre 15. Ginpasakaan sila sang kaso nga libel sang gubernador kag lokal nga upisyal sang prubinsya.

Isa ka adlaw antes sini, ginluthang kag napatay ang mamahayag nga si Jobert Bercasio sa Barangay Cabid-an, Sorsogon City sang Septyembre 14. Si Bercasio ang ika-17 mamahayag nga ginpatay sa idalom sang rehimeng Duterte.