Naglab-ot sa masobra tatlo ka semana antes ginhatag sa pamilya ang bangkay ni Vilma Salabao, unyonista nga nalakip sa ginmasaker sang pulis kag mga tinawo sang 2nd ID sa isa ka pahuan sa Sityo Malalim, Barangay San Jose, Baras, Rizal sang Disyembre 17, 2020.

Lakip man sa mga biktima sa amo nga masaker sanday Carlito Zonio, tagaasikaso kag nagapamuno nga upisyal sa seguridad sang pahuan; magpakaisa nga sanday Jonathan kag Niño Alberga, mga gwardya; kag si Wesley Omberga. Si Omberga may tuberkulosis kag balatian sa bato, samtang may kanser si Salabao. Ginatawag ang mga biktima bilang Baras 5.

Sa imbestigasyon sang Karapatan-Southern Tagalog, nakit-an ang mga palatandaan sang grabe nga tortyur sang mga bangkay sang mga biktima.

Pagkatapos ang makangilidlis nga krimen, nagtanom sang mga ebidensya nga armas kag bomba ang mga pasista para paggwaon nga mga katapo sila sang Bagong Hukbong Bayan (BHB). Una nga ginbalita sang 2nd ID sa pagpamuno ni Lt. Gen. Antonio Parlade, Jr. nga kuno mga kolektor sang rebolusyonaryo nga buhis ang ila mga biktima, kag napatay sang magbato. Makalipas ang pila ka semana, ginhambal naman ni Sec. Eduardo Año sang Department of Interior and Local Government nga mga partisano kuno ang mga biktima.

Pagpamatay. Ginpatay sang Philippine National Police (PNP)-Camarines Sur si Aldren Lagdaan Enriquez, aktibo nga myembro sang Camarines Sur People’s Organization nga gin-akusaran nga myembro sang BHB sang Enero 6 sa Barangay Sagrada, Iriga City. Ginsulod sang 30 pulis ang iya nga balay kag wala kaluoy siya nga ginluthang sa atubang sang iya nga duha ka lamharon nga anak.

Ginpatay man sang PNP-Region 5 si Eddie Barcoma Belludo sang Sityo Camenorial, Barangay Banquerohan, Legazpi City sang Enero 11. Gin-akusar siya nga myembro sang hangaway sang banwa kag gintamnan sang ebidensya nga pusil kag bomba.

Pagpang-ipit. Ginpasakaan sang himu-himo nga kaso sang pagpatay si Windel Bolinget, pangulo sang Cordillera People’s Alliance (CPA) base sa akusasyon sang isa ka pulis sa Tagum City, Davao del Norte. Gin-akusar siya kag siyam pa ka indibidwal sa pagpatay kag Garito Tiklonay Malibato, myembro sang grupong Lumad nga Karadyawan, sang Marso 2018. Si Malibato ginpatay sang paramilitar nga Alamara.

Iligal nga pag-aresto. Gin-aresto sanday Ruel Custodio kag Ruben Estocado, pareho nga manugniyog nga myembro sang Coco Levy Funds Ibalik sa Amin, sang gintingob nga pwersa sang mga pulis kag suldado sang 201st IBde sa Barangay Zone 3, Poblacion, Atimonan, Quezon sang Disyembre 26. Gin-akusar sila nga mga myembro sang BHB kag gintamnan sang mga pusil kag bomba. Wala sila ginpahanugutan nga mabisitahan sang ila nga mga pamilya.

Pagdukot. Wala pa gihapon ginapatuhaw ang mangunguma nga si Anselma Garde, 31, halin sang siya gindukot sang 62nd IB sang Enero 17 sa Sityo Batong-buang, Barangay Trinidad, Guihulngan City, Negros Oriental.

Sa pareho nga adlaw, ginkanyon kag ginbomba sang militar ang ulumhan nga kabahin sang mga barangay sang Sandayao, Trinidad, Binobohan, Imelda kag Tacpao sa pareho nga banwa. Nagresulta ini sa pagbakwit sang mga 100 pamilya.