Sa atubang sang nagatinaas nga presyo sang utanon, wala sang plano ang Department of Agriculture nga pabaskugon ang produksyon sini sa pungsod. Ini mismo ang nag-anunsyo sa posibilidad nga makaagi ang pungsod sang 79 adlaw nga kakulangon sang utanon subong nga tuig. Ginatantya nga magalab-ot sa 434, 841 metriko-tonelada (MT) ang kulang, katumbas sang konsumo sang mga Pilipino sa sulod sang duha kag tunga sa bulan.

Sang nagligad pa nga tuig ginreklamo sang mga bumalakal ang pagtimbuok sang mga presyo sang utanon nga dulot sang kakulangon sang suplay. Ginatantya nga nagtaas sang 60% ang mga presyo sang utanon sa kabilugan halin pa Nobyembre. May mga utanon nga halos doble ang pagtaas sang presyo.

Imbes nga resolbahon ang kakulangan sa lokal nga suplay, mas gin-una sang rehimen ang pagpabaskog sang produksyon sang mga produkto pang-eksport. Nagtalana ini sang ₱300 milyon para sa Productivity Enhancement Project, isa ka proyekto para sa pagpauswag sang produksyon sang pang-eksport nga mga pananom pareho sang saging, kawayan, paho kag sibuyas. Pinakadaku ang gintalana para sa saging (₱220 milyon). Lunsay mga daku nga prodyuser nga nakarehistro sa Security Exchange Commission ang mahimo nga makabenepisyo diri kag indi ang gamay nga mga mangunguma. Sa pihak nga bahin, nagtalana lang ini sang tig-₱3,000 ayuda nga kwarta kag ₱2,000 ayuda nga pagkaon sa ginatantya nga 900,000 libo nga mangunguma para sa bilog nga tuig o katumbas sang gamay nga ₱8 kada adlaw.