Subling nagsabwag og teror ang giusang pwersa sa pulis ug militar sa tulo ka sityo sa Barangay Nagbinlod, Sta. Catalina, Negros Oriental niadtong Marso 29. Lima ka sibilyan ang giaresto, lakip ang 2-anyos nga bata, ug duha ang gipatay. Sama sa una nang mga kaso sa pagpangatake sa mga sibilyan, gitamnan og pusil ug armas ang mga balay sa mga biktima ug giakusahan silang mga myembro sa Bagong Hukbong Bayan (BHB).

Gipatay sa Sityo Balog sa maong barangay silang Fredo Binangkil ug Julito Solano sa reyd nga gipagawas nga engkwentro tali sa militar ug BHB. Sa mga sityo sa Payawpayawan ug Bayog giaresto ang magtiayong silang Marites ug Benjie Saingga ug ilang 2-anyos nga anak, Wilmar Jiminez ug duha pa ka mag-uuma.

Kadungan niini, gireyd sa mga pulis ang balay ni Nene Solano, lider sa Kilusang Magbubukid ng Pilipinas-Negros Oriental, ug gikulata ang iyang ugangang-lalaki.

Pagpamomba. Grabeng kahadlok ang gibunga sa unum ka hugna nga paghulog og bomba sa AFP sa mga komunidad sa mga mag-uuma ug lumad niadtong Abril 6 sa Barangay Kasapa II, La Paz, Agusan del Sur. Pipila ka beses usab na giistraping ang lasangong bahin sa lugar. Sukad pa Pebrero ginautingkay sa mga pwersa sa 60th IB ug 26th IB sa utlanan sa La Paz, Loreto ug San Luis sa Agusan del Sur ug Kapalong sa Davao del Norte.

Pagpamatay. Gipusil patay si Jesus Pason Jr., drayber sa traysikel ug residente sa Basurahan, Barangay Mambulay, Silay City, Negros Occidental niadtong Abril 17. Myembro siya sa Pasil Homeowners Association, Inc. ug Kadamay-Negros.

Iligal nga pag-aresto. Sa Eastern Samar, giaresto sa 52nd IB silang Erwin Ramirez Mortal ug Pablito Lapesora Libanan niadtong ulahing semana sa Pebrero sa akusasyon nga mga myembro sila sa BHB. Parehong residente sa Casapa, Barangay Dinigpian, Dolores ang duha ka mag-uuma.

Sa Bohol, giaresto si Oscar Balonga, lider sa Bongbong Farmers Association niadtong Abril 7 ug gipreso sa Trinidad Police Station.

Pagdagit. Gidagit sa mga ahente sa NTF-ELCAC silang Alicia Lucena ug Sofia Bangayan, mga myembro sa Anakbayan, human gipaadto sa mga upisyal sa Barangay 483 sa Maynila sa barangay hall para kuno sa randomized swab testing niadtong Abril 19. Hinanali nga gibuhian si Bangayan samtang wala pa nakit-an sa iyang abugado ug mga higala si Lucena . Usa si Lucena sa ginganlan kanhi sa NTF-ELCAC nga “gikidnap” sa Kabataan Party List ug Makabayan aron dautan ang mga aktibista. Anak siya sa ahente sa NTF-ELCAC ug tigpamaba sa grupong Hands Off Our Children nga si Relissa Lucena.

Red-tagging. Napugos ang mga boluntir sa “community pantry” sa Maginhawa, Quezon City ug Pandacan, Manila nga temporaryong sirad-an ang ilang operasyon niadtong Abril 20 human gi-red-tag sa pulis ang ilang mga aktibidad.

Ang community pantry usa ka porma sa pagtinabangay sa katawhan kung asa kinabubut-on nga nagahatag ang mga adunay ekstrang pagkaon ug libre kining kuhaon sa kinsamang nanginahanglan. Gisugdan ang maong inisyatiba niadtong Abril 15 nga nag-engganyo sa paglunsad sa kapin300 pa ka susamang inisyatiba sa lain-laing bahin sa nasud.

Ayha niini, nahimong target usab sa red-tagging ang mga unyon sa mga empleyado sa Senado ug Korte Suprema, ug ang Alliance of Health Workers.