Taliwala sa malukpanong disempleyo ug paghagba sa kita ug negosyo, minilyong piso ang gitanhag sa nahataas nga upisyal sa pribadong mga kumpanya sa ilang mga kaugalingon sa dagawy sa mga bonus ug dugang sweldo niadtong 2020.

Duha sa unum adunay pinakadakung bonus silang Felipe Gozon ug Gilberto Duavit nga nagadawat og ₱259 milyon sa 2020, 43% nga mas taas kumpara sa 2019. Dugang dinhi ang 37% nga giusbaw sa ilang mga sweldo. Tag-as nga upisyal sa GMA 7 ang duha.

Ingonman, misaka og 12% ang sweldo ni Manuel Pangilinan ug uban pang upisyal sa PLDT, kung asa nakapailalum ang Smart Telecommunications. Usa ka milyong piso usab ang gidugang sa kanhi nang taas nga bonus sa mga upisyal niini.

Sa pikas bahin, misaka og 6.4% ang sweldo ug bonus nilang Ernest Cu ug upat pa ka upisyal sa Globe Telecommunications ngadto sa ₱295 milyon niadtong 2020 gikan ₱277 milyon niadtong 2019.

Samtang 17 bilyunaryong Pilipino ang anaa sa listahan sa Forbes sa pinakaadunahang indibidwal sa tibuok kalibutan. Si Manuel Villar (ika-352 sa tibuok kalibutan) ang adunay pinakadakung deklaradong bahandi, sunod si Enrique Razon, Lucio Tan, Andrew Tan, managsuon nga Sy, Ramon Ang, Lance Gokongwei, Roberto Ongpin, Ricardo Po ug Edgar Sia. Sa tibuok kalibutan, ang tag-iya sa Amazon nga si Jeff Bezos pa gihapon ang numero uno.