Ginbuyagyag sang Qurium Media, organisasyon sa cybersecurity nga nakabase sa Sweden, isa ka report sang Hunyo 22 nga ang Armed Forces of the Philippines (AFP) kag Department of Science and Technology (DOST) amo ang sa likod sang mga distributed denial of service (DDoS) attack sa mga grupong Bulatlat, Altermidya kag Karapatan. Nagsugod ang mga atake sang tunga-tunga sang Mayo kag sa putok-putukan sa tunga-tunga sang Hunyo kag nagapadayon tubtob subong. Sa DDoS, ginadumog sang pila ka milyon nga nagasulod sa website para maghinay ini.

Kadungan man sini ang mga DDoS attack sa website sang Philippine Revolution Web Central (PRWC sa https://philippinerevolution.nu) nga nagdulot sang pana-panahon nga pagkadula sini. Gingamit man sang AFP ang mga pekeng akawnt sa Twitter para itulod ang kumpanya nga ipasira sang temporaryo ang akawnt sang PKP (prwc_info) kag dalayon nga sablagan ang upisyal sini sa impormasyon (@marco_cpp).

Suno sa Qurium, ang mga IP address nga gingamit sa mga pag-atake direkta nakaangut sa upisina sang militar sa Taguig City, kag sa proyektong Philippine Research, and Government Information Network sang DOST. Ginapaimbestigahan subong sa Kongreso ang insidente.

Samtang, ginsulod man sang indi-awtorisado nga mga elemento ang membership application o app sang 1Sambayan sang ikaduha nga semana sang Hunyo. Ginapatihan sang grupo nga kahimuan ini sang mga karibal sini sa pulitika.